Ka seiñ kiwa khayi pateiñ kawa tip kam ka Jaintia Tribal Traders’ Association (JTTA) da booddien ko yei pynkreh ya ka Iawmusiang Shopping Complex hadien wa da sangeh da boon boon bnai heiwa da lai yachem ko ya u Executive Engineer PWD Building yow paan yumut yei daw wa sangeh i kreh heiwa da pyntip u wa da dep ka chnat wow e chithi cha u Contractor yow sdang kreh noh yei kaam wa dang sah tangwa ym em jubab u ya ka chithi yong ki wei ym em sdang u leh yei kreh kamtæ da pyndam noh ya uni u Contractor heiwa da khut Tender noh da kawi yow pyndep yei kaam wa dang sah.
Tangwa uni u Contractor manda yoo u yeini i khut Tender da e noh u da ka mukotduma pyrchah ya ka sorkar waka chnat PWD (Building).
Kamtæ ka seiñ da lai yachem ko ya uni u Contractor, uwa da khana wa ka chnat sorkar ym em su ko ya ka poisa wa dang sah kamtæ kammon u sdang u yei kreh wa thymme.
Chooh chooh ka seiñ da paan ko da ka RTI na ka Jaiñtia Hills Autonomous District Council kam ka tre thaw wa naka PWD (Building) kam kawa pynkreh ya ini i kaam heiwa ka JHADC da pyntip ko ym em pteiñ yei kreh da ka PWD, wei ym pu yoh ya ka poisa kawa man ka bhah wa ar namo ka Second Installment na ka Ministry of DONER.
Neiliang ka PWD leh da pyntip ko yei jooh wei i daw wa sangeh i kreh toh neidaw wa dang em ka mukotduma pyrchah yei pynreh ya kani ka Iawmusiang Shopping Complex kamtæ ym ye u ong mynnu u pyndep yei kreh.
Hajrong ini waroh ka seiñ da sñiawphylla ko wa kammon da khut Tender thymme hawa tang ka poisa leh ym em, wei kammon u MLA ka Jowai ong u wa lym toh wa yaleh mukotduma u Contractor da yoh wow sdang kreh ya kani ka Shopping Complex, kamtæ da sñiaw wa ini i kaam da sah i hei doom i wym poi cheiwon cheiwon.
