I tih mooyong hanla da sdang wai biang hapoh ka jylla Meghalaya, ki kyndon wow yoh u tih mooyong dang man ko kawa khor ya kiwa boon neidaw wa i thaw tih mooyong wa emkaam da man ko hadooh 100 Hectare katkam ki SOP wa da pynmih da ka sorkar India.
Hawa kylli hajrong ini ha u Montri Rangbah ka jylla, u Conrad Sangma da ong u wa kini ki SOP toh kiwa da pynmih da ka sorkar pyrdi wei heitu i por lada yaklam chaphang ini ym poi dei cheiwon cheiwon yow ye u sdang noh wow tih mooyong wei iwa emkaam toh yow sdang noh u tih mooyong.
Kamtæ da ong u wa hadien daw yaklam yow pynkhian noh ya ini tangwa yow yoh chwa u sdang u tih mooyong da lai chakhmat wa ini i kyndon wa da booh ka sorkar India wei kattæ da yoh wow tih mooyong noh.
Chooh chooh da ong u wa neini chakhmat daw pynche ya ka sorkar pyrdi wa cha i ym em kiwa em thaw wa heh hadooh 100 Hectare wei lada ye wow pynduna ya ka 100 Hectare ym pu tip tangwa da yooluti u wa hadien wa ka sorkar sñiawthooh ko wei yoo ko yei long i man daw ye u pynsñiawthooh yow pynkylla noh yeini.
Tangwa iwa emkaam dooh toh wa da ye wow sdang ya ka Scientific Mining iwa man katkam ka aiñ wei ha kini ki 60 sngi wow wan daw ye u sdang noh u wai ya kini ki thaw tih mooyong wa thymme.
