Nadooh wa sdang ka Raij ka Chnong,
Trekirot ya ki dadep pynthiah pynchong;
Tawiar Takan, Soo Dwar Soo Luti,
Wow daa wow kær yei chnong Jwai yong-i.
Mookhai, Mooralong, Moosniang, Mootong,
Soo ngut Chipayu talawiar i chnong;
Deilang ka Tawiar Takan wakhang wakah,
Yow hun i chong- yow hun i sah.
Tawiar Takan, Soo Dwar Soo Luti,
Blai Chnong-Blai Raij yong-i man phi.
Pait miet, pait ang yei chnong i thaw,
Ha ki wym em step, sngi, miet næ synñiaw.
Ya ki dadep pynthiah pynchong,
Deilang ka Niam – Rukom, Hukum- Adong;
Pateiñ khon – pateiñ ksu yoh phi u tip u bna,
U e bhah e bynta na’u Ñiaw Wasa.
Khon ka Raij- ka Chnong kheiñkor, kheiñ kyntang ya ki,
Kam kitæ ki Blai Chnong Blai Raij yong-i;
Ham ong i tæ ki wym em i ngait,
Ya samboi u poi pathan cha wa lait.
Neibhah lada pyrchah næ kaap hukum nei wabooh u Blai,
Chisien ka sngi daw man i tynjooh yow bru pyrthai;
Hawa kut dei Syiar, Blang daw duk u toh,
Chei suk ha’u bru pyrthai tæ wym yoh.
I man Sarot, Kyntang yong ki,
Emkaam i na nga, naphi;
Yow tip, u che ka pyrthai,
Ya ki, dadep pynthiah pynchong da ki hukum Blai.
Blai Chnong Blai Raij yong-i,
Ood naam O yei pyrtuid yong phi;
Ya ka khlam ka kjut to beh cha jngai,
Cha wa Sep ka Sngi- Cha wa Soo u Bnai.
Discussion about this post