U Montri Rangbah ka jylla, u Conrad Kongal Sangma da thæh um dait-thah u yei dawa ka A’chik Conscious Holistically Integrated Krima (ACHIK) wow pynkrehkaam ya ka Roster System deiwa kheiñ nadooh nachwa na warim. Da ong ong u wa u kyruiñ dien biang katni wow pynkrehkaam ya ka Roster man iwa eh, neibhah ya ka rai da chim hadien wa dadep yasyllok wa waroh kiwa embynta wa kynthup ya ka ACHIK na Ri-loom Garo.
Ka ACHIK da pynman ko ya i chah thngan wa khlem booh por wow dawa na ka sorkar wow pynkrehkaam ya ka Roster nawa sdang hawa thungkreh sorkar wei kamjooh wow pynman ya ka Tura kam ka nongbah tlang ka jylla.
Hawa klam ynne, u Conrad da ong u wa heiyatoh wa ka Roster System, ka sorkar dadep chim ko ya ka rai hadien wa da syllok sani bha wa waroh kiwa embynta wei da pyntip leh yei rai ka sorkar cha ka ACHIK, wei hadien i yasyllok da lai chaphrang wow rai pynmih noh ya ka Office Memorandum kawa thymme.
Heiyatoh wa i dawa pynman nongbah tlang ya ka Tura, da ong u wa ka thong yong ka sorkar toh wow wanrah ya i roi i ku wei ka Mini Secretariat kawa da booh ha Tura toh ki dak wa khroo wow yarap ya ka thaaiñ, deiwa pynkhlan leh ya ki chnat krehkaam waphær waphær ka sorkar wow pyntikna wa i synchaar khadar poi i cha ki paidbah.
Da ong u wa i dawa ka ACHIK toh wow pynjan ya i synchaar cha ki paidbah wei ka sorkar da leh ko yeitæ, hanlada dang emkaam chiboon wow leh wei ymye won wow leh ha i jooh i por neibhah wa em da u pood hadooh katwon wa ye u leh.
Discussion about this post