Ka Congress kawa em kattæ 2 ngut ki MDC hapoh ka Khasi Hills Autonomous District Council (KHADC), ye ko wow mih noh nei ya krehlang hapoh ka Khasi Hills Democratic Front (KHDF) wa yahkhmat ya ka Executive Committee da ka NPP.
Kiwa kyrchaan wa kiwa kreh hakhmat ka Congress da pynmih ki ya ka sur wa ka Congress toh wow mih noh na ka Executive Committee wa yahkhmat da ka NPP ha KHADC, ha ka yalang kawa da pynman ynne ka sngi ha Congress Bhavan, Shillong.
U President ka Meghalaya Pradesh Congress Committee (MPCC), u Vincent H Pala da ong u wa i ya krehlang ha District Council toh neidaw wa em i pynkylla ya ka Sixth Schedule, khnang wa ka Party leh u yoh ko wow e buit.
Da pdiang u wa da em i dawa wow mih noh nei ya krehlang waka NPP ha KHADC, wei ka yalang da rai ko wow e kti ha u President wa ki MDC wow rai, deiwa pynrap wa ka Party ye ko e yumut ya ki MDC wei chong ha uwa yahkhmat ka Parliamentary Party wow chim yei rai.
Neiliang u Pynshngaiñ N Syiem uwa man u Deputy CEM ha KHADC, da ong u wa ha ka chi snem wa da lai, ka Congress hapoh ka Executive Committee da e yarap ko chiboon hapoh KHADC deiwa yoh yei mynjur ki boon tylli ki Bill.
Da ong u wa i ya krehlang hapoh ka KHADC wa ka NPP toh neibynta i myntoi ki paidbah wow pynsmat ya ki kaam wa jhan wei heijooh i por da pdiang u wa ka sur da thai bha wow mih noh na ka Executive Committee wei ka yalang da e yumut ko wow yaklam bniah hapyrdi u President wa ki MDC.
Discussion about this post