Ka seiñ Hynñiewtrep Border Dispute Redressal Forum (HBDRF) ha ka chithi wa da e ki cha u DC ka West Jaiñtia Hills District da kam ki wa ki Karbi hi wa thang pyn ya ki yung trep yong ki hi dep te pynbaad ki cha ki Pnar yow pynmih awri awra ha Khanduli.
Ka HBDRF da ong ko wa i kynaad hapyrdi kiwa chong chnong ka Khanduli wa ki Karbi da sdang i nadooh ka 15-04-23 hadien wa ka Karbi Anglong Autonomous Council (KACC) booh ko ya ka khyrdop khrong dan namo ka Entry Tax Gate ha Khanduli kawa dang haap hapoh ka jylla Meghalaya hadooh wa da hap lai tympra kiwa chong chnong ka Khanduli ya kani ka khyrdop ha ka 17-04-23.
Ha ka 06-05-23 da phah biang ka KAAC wow pynyieñ ya kani ka Gate tangwa da pynsangeh da ki pulit ki ar jylla.
Da mih biang i kynyaad ha ka 11 tarik uni u bani hadien wa uwi u bru Karbi da chah dat u ha kiwa chong chnong ka Khanduli hadien wa chah thang ar tylli ki yung trep ki Khanduli wa em harood kawi ka lyngkha ha ki 5-8 ngut ki nong Karbi.
Wei ka khubor wa da mih na ki Karbi ha ka 13 tarik uni u bnai da em wa thang yei trep wa em ha chnong Myn-i ha i thaw tih moo ha Samymthoo heiwa ki Karbi da pynbaad ki wa ki Pnar da thang ki ya i trep ki Karbi wei ha ka 14 tarik won da kam ki wa ki Pnar da thang ki yei yung yong kawi ka Karbi wa em ha chnong Ningkreng.
Kamtæ ka seiñ da ong ko wa yeini da leh pyn da ki Karbi hi tangwa da pynbaad won cha ki Pnar yow sdang yei kynaad hapyrdi kini ki ar jaitbru.
Hajrong ini da kyrpaad ya u DC wow khut ya ka yalang yow pynyasuk biang ya kini ki ar jaitbru wa em ha khappood kamjooh wow e yada ya ki.
