U President ka EJNC uwa man leh u Secretary ka Jaiñtia Coordination Committee for Reservation Policy (JCCRP), u Sambormi Lyngdoh ynne da ong u wa ya ka JCCRP da sdang nadooh u 2022 wei da chynna jngai wa da emkaam wow pynkylla noh ya ka Reservation Policy neibhah wa da boon ki jaitbru Khasi Jaiñtia chawa palat ya i boon ki Garo heiwa da e dorkhat chwa ya u Montri Rangbah wow dawa wa ymtoh u pynkrehkaam ya ka Roster System nadooh u 1972 tangwa na uni u snem chaphrang.
Da ong u leh wa ka sorkar ym pynbait ko yeini wei da yoh mynsien ki kam ka JCCRP hadien wa ki soo ngut ki MLA ka VPP da wanrah ki ya ini i kaam ha Yung Dorbar Chna Aiñ ka jylla wei da pynkhih win ki ya ka Khasi Jaiñtia nei chah thngan u Ardent Miller Basawiawmoit.
U Samborlang da ong u leh wa lada ym pynbait ya kani ka Reservation Policy da tikna wa daw em ki wow lai cha ka yung bichaar hajrong ini i kaam.
Chooh chooh da ong u wa lada ka sorkar pyrdi neipor cheipor pynkylla ko ya ka Reservation Policy hapoh ka ri tæ neiyi i daw wa ki sorkar ha jylla nadooh kiwa da rim ym bien ki wow pynthymme ya ka Reservation Policy neibhah cha kiwi ki jylla da sylli ki ya ka man la ka 10 snem neibhah i rukom boon paaid phær i na ki phaw snem cha kiwi khnang wow lait na i noh chiliang ka Reservation Policy.
Ha kani ka sngi u Sambormi da ong u wa u MLA ka TMC na Rajabala, u Dr. Mizanur Rahman Kazi da e khubor u wa emkaam u e bhah 50% ya kiwi ki jaitbru kiwa na kiwi ki jylla kiwa em ha Garo Hills, deiwa kylli u Sambormi kammon nood uni u MLA wow paan bhah ya kiwa na baar jylla wei ini man i buit ka sorkar wow pyndaithah ya ini i yakhih hapoh ka jylla kamtæ ka EJNC da thang ki ya i dur uni u MLA kam ka dak wow beiñ joor ya oo.
