Hadien wa em kawi ka chithi “Open Letter” kawa da kam hi-eh wa pynmih da ka Coordination & Welfare Committee (CWC) deilang wa ki Bengali waroh kawa da thoh cha u President wa u General Secretary ka Khasi Students’ Union kawa da maham wow pynyap wei wow khrai khlieh ki ha iwon iwon heiwa kani ka chithi da pynpoor ka ha ki Social Media hanla ym ye u pynsakhiat yi wa thoh ka wei ka wym em wa soi pyrtuid, neiliang u SP ka East Khasi Hills da kyntu ya ki paidbah wym toh u ngait yeiwa da thoh ha kani ka chithi.
Ha kani ka chithi da ong wa da pait ki ya ki KSU da slem wei rukom pyrkhat jaitbru ri-loom da pyn-eh bha ko ya ki wow wai yei khmat kamjooh i jabieñ ki, kamtæ da maham ki wa i um snaam wa da leh ki nachwa daw yoo sakhi biang ki ha kini ki sngi wow wan.
Da ong ki leh wa chwa u leh yeini daw chim yei khlieh yow pynyoo kiyi ki tre thaw sakhiat kitæ ki “Bengali” wei hadien wa dep ah khlieh, daw pynchitom ya ki bru yong phi katwa yoo hun ki.
Da pynkynmoo ki leh ya ki Khasi ki wym em ki bru ki heitu i por wa chim ki ya iwi i mynsien ki ha u snem 2020 wei lada kwah ki wow wiar jait neini na sla pyrthai wow pteiñ ki wow leh kamwa leh ki lakam ki kiwa em hei bor wa pynlai ya waroh i jait hanla ki Bengali toh ki tre ka Meghalaya wa waroh ki kor wa pynlai ka.
Da maham ki leh wow pyndooh jait ya ka KSU wa ki bru wa sah ha khappood hei kti ki Bengali.
Neiliang ka KSU kam wow jubab yeini da thang ko ya kani ka chithi ynnin i miet.
U SP won da ong u wa kani ka chithi toh wa em kiwa chna thok donhi heiyatoh wa iwa jia haka 27 tarik uni u bnai ha Ichamati wei kam kini ki rukom pynchit daw ktah joor ko yei suk i saaiñ wa i krehkaam ka aiñ wei ki paidbah ymtoh u ngait biej ki khlem da pyntikna chwa.
Da kyntu leh ya ki paidbah wym toh u pynpoor ya kam kini ki jait khubor thok khlem da ye u pyntikna.
Discussion about this post