Ynne i janmiet kam chibynta wow beiñ yeiwa chah siat yap ki 5 ngut ha Mukroh ha ka 22 tarik uni u bnai, neiliang ka yakhih wa tip kam ka Save Hynñiewtrep Movement (SHM) kawa kynthup yaka HYC, JSM, CORP, EJNC waka HANM da thang ki yei dur bula u Montri Rangbah ka jylla, u Conrad K Sangma, u Montri Rangbah ka Assam, u Himanta Biswa Sarma wa u Montri ki Kaam Pohyung ka ri u Amit Shah.
Ya ini i thang da pynman ha thaw pynyieñ kari Ummulong iwa em haphrang ka Jowai Police Station.
Hachwa wow thang ya i dur bula da pynman yaka yalang ya kawa da pynlai da u Roykupar Synrem uwa man u General Secretary ka HYC-CEC, uwa da e khublei ya ki seiñ kiwa da embynta ha ka SHM ynne ka sngi heiwa kani ka janmiet toh wow beiñ yeiwa da jia i chah tynyap ki san ngut ha ka chnong Mukroh.
Da beiñ u ya ki le sorkar kiwa kynthup ya ka sorkar Assam, ka sorkar Meghalaya waka sorkar India kiwa da kheiñstiñ heiyatoh wa i pynbait ya u pood ki ar jylla.
Neiliang u Roamingstar Lamare uwa man u Secretary ka HYC-Jaiñtia Hills hawa e yei klam da ong u hawa em i chah pyndik neipor cheipor wanrah i yei chrai ha kiwa kitkaam ki seiñ, da dawa u leh yei hok na ka sorkar khnang wow yoh kiwa da khlaad yei bichaar wa toh u yoh ki.
Chooh chooh da pynkynmoo u yeiwa kular ka sorkar wow pynkrehkaaam ya ki Regional Committee wow pynbait ya u pood hapoh 45 sngi wei katni da kynjoh cha ki 60 sngi wei lada toh wa ka sorkar chimkhia ko yeini, i jia ha Mukroh leh wym jia hi i wei ini pynyoo i yeiwa kheiñstiñ ka sorkar jylla.
U Bandari Ryntathiang uwa man u President ka CORP hawa e yei klam da ong u wa ka sorkar jylla da man ko kawa jem neibhah wym nood ko u kem ya ki bru kiwa siat khiar ya ki san ngut wei da toh u kem noh ya ki.
Da ong u wa ya u bru wa kjut wa chitom da wan siat heipor wa thiah, tangwa ya kiwa wan siat ya ki san ngut won ka sorkar ym nood ko u kem ya ki wei da toh u lai kem noh ya ki. Heijooh i por da kdaw u yeiwa klam u MLA ka Mowkaiaw ha yung dorbar ha uni u snem tangwa manda poi ha ini i jia da rai wow phah ya ki pulit cheitai ini man iwa ymye wow ngait wow pdiang.
Chooh chooh da kylli u wa neiyi i daw wa em ki pulit ki wym em u yohbor wow siat ya ki Assam, katwa kamtæ da dawa wow pyndep noh ya i thung kreh pulit wa da sahteiñ.
Ha kani ka janmiet da thang noh ya ki dur bula ki le ngut deiwa jai jai.
