Shillong: Ki le tylli ki seiñbhalang na ka jylla Meghalaya wa kynthup ya ka Federation of Khasi Jaiñtia and Garo People (FKJGP), Hynniewtrep National Youth Front (HNYF) waka Ri-Bhoi Youth Front (RBYF), ynne ka sngi da pynman ki ya ka yalang pyrchah ya i thmu wow pynman aiñ ya ka Citizenship Amendment Bill 2016, kawa da mynjur ha kini ki sngi da ka Lok Sabha.
Ki dkhot kini ki le tylli ki seiñ da yalang ki ha Khynde Lad wow pynsñiaw ya ka sur pyrchah wei wow beiñ joor ya ka sorkar National Democratic Alliance (NDA) wa yahkhmat da ka Bharatiya Janata Party (BJP) kiwa da pynbaad wa kani ka sorkar hapoh i yahkhmat u montri rangbahdooh ka ri India u Narendra Modi da lem embor ki wow mynjur ya ka Bill kawa man pyrchah ya i mon wa i sñiaw ki paidbah, wa ki jaitbru ri-loom wa khian paaid ka jylla Meghalaya wa ka thaaiñ mihsngi ka ri India.
Kini ki seiñbhalang da thang ki leh ya ki dur-bula ka Citizenship (Amendment) Bill, 2016, u montri rangbahdooh ka ri India u Narendra Modi, u montri kaam pohyung ka sorkar pyrdi u Rajnath Singh wa u National President ka BJP u Amit Shah.
Hawa klam ha ka yalang pyrchah, u Sadon Blah, General Secretary ka HNYF, da ong u wa ka sorkar India da thok da chukor ko ya ki paaidbah ka thaaiñ mihsngi wei da thok nyngkong deiwa phiah ya ka Ri India ha u snem 1947 wei katni won da chah chukor biang deiwa wanrah ya ka Citizenship (Amendment) Bill, 2016.
“Ki seiñbhalang waphær waphær na ka thaaiñ da pynsñiaw ki yei pyrchah ya ka CAB hakhmat ki dkhot ka Joint Parliamentary Committee (JPC). Tangwa sñiawsih wa ka sorkar NDA wa yahkhmat da ka BJP ka lai ko cha khmat wow mynjur ya ka Bill ha Lok Sabha khlem da kheiñ kor ya i pyrchah wa joor,” da ong chooh chooh u Sadon Blah.
Da ong u leh wa ini pynyoo wa ka BJP ym em ko i sñiaw neibynta ki paidbah yong ka thaaiñ mihsngi wa ya ka mynried ka mankawi yong ki wei u chim ki kawon kawon ka laad ka luti yow yoh myntoi ha ki kaam saiñ pyrthai.
Da kylli u leh ya ka sorkar NDA kammon u pdiang ko ya ki 16 Million ngut ki Hindu na Bangladesh neibhah ki jylla ka thaaiñ mihsngi em ki u pood wa jrong bha waka Bangladesh wei ki da pynkhreh ki wow psiah cha India chisien wa man aiñ kani ka Bill.
Discussion about this post