Mawkyrwat: U Pius Marwein u kyrtong ka United Democratic Party (UDP) ynne ka sngi da thap pyrtuid u neibynta wow yakhun ya ka election chiteiñ samoi na 35 Ranikor Constituency.
Hawa yaklam wa kiwa pathai khubor hadien wa dep thap pyrtuid ha yung krehkaam ka Deputy Commissioner ha Mawkyrwat, South West Khasi Hills, neiliang u Pius Marwein uwa man leh u kyrtong wa man wa-ar ha ka election wa dang dep, da ong u wa da pynkhreh bha u ha kane ka kynti wei da kyrmen u wow jop ha kani ka yakhun.
Neiliang u general secretary ka UDP, u Jemino Mawthoh da ong u wa ka yakhun ha kani ka election ha Ranikor man ko hapyrdi u kyrtong ka UDP, u Pius Marwein wa u MLA warim uwa man u kyrtong ka NPP, u Martin M Danggo.
Kamwa man katni da em 4 ngut ki kyrtong wa da tikna wow yakhun ya ka election chiteiñ samoi na Ranikor ka wow man ha ka 23 tarik uni u bnai, kini ki kyrtong da thap pyrtuid ki kiwa kynthup ya u Martin M Danggo (NPP), u P N Syiem (PDF), u Pius Marwein (UDP) wa u Jacques Sangma (INC).
Discussion about this post