Ka sngi wa ar ka dorbar ka Lok Sabha wa 18 da lai ko chakhmat ynne ka sng heiwa u Om Birla da thap pyrtuid u neibynta wow yaleh yow man kam u Speaker ka Lok Sabha deiwa synraan kiwa yahkhmat ka NDA kam u Amit Shah wa u JP Nadda.
Ka liang pyrchah won da yachem ko ya u Rajnath Singh wa u Amit Shah yow yaklam heiyatoh waka chuki u Deputy Speaker ka Lok Sabha wei hadien kani ka yachem, uwa yahkhmat ka liang pyrchah, u KC Venugopal da ong u wa daw pynyieñ kyrtong ki neidaw wa slem ka sorkar wow e jubab.
Ynne ka sngi da pteiñ yei chim smai kiwa boon ki MP wa kynthup nadooh u Rahul Gandhi, u Akhilesh Yadav, ka Mahua Moitra, ka Supriya Sule, ka Kanimozhi Karunanidhi, u Sudip Bandyopadhyay wa kiwa boon ki MP na ka thaaiñ North East.
Kam wow pynkynmoo wa ynnin ya u Bhartruhari Mahtab da pynsmai ya oo kam u Pro-Tem Speaker wei heipor wa u Prime Minister, u Narendra Modi chim u yei smai, neiliang ka liang pyrchah da yieñ ki deiwa ksoh ya ka Constitution ha kti wei da leh ki yei jooh heipor wa u Home Minister, u Amit Shah chim smai u tangwa khlem da yieñ ki.
Ha kani ka sorkar wa katni, ka NDA da em ko 293 ngut ki MP heiwa na kini ka BJP da em ko 240 ngut iwa duna ya ka 272 ngut yow ye u chna sorkar dei bor yong ka samen katwa ka liang pyrchah kawa tip kam ka INDIA Bloc da em ko 234 ngut ki MP.
Discussion about this post