Shillong: Ka seiñ Thma U Rangli Juki (TUR) da kam ko wa da chem ko chiboon i duna ha ka Fifth Pay Commission hanlada pynkmen ko ya kiwa kreh sorkar katwa ya kiwa kreh ha ki kyrdan wa em rap hapoh kam ha ki Grade 3 wa Grade 4 ymtoh kawa kmen ya ki.
Katwa ka sorkar da pynkhreh ko wow pynku tulop ya ki 68,280 ngut kiwa kreh sorkar wa pura da em leh i thmu ka sorkar wow e kti cha ki bru samen namo ki Company wow pyllai ya ka thung kam thung jam ha ki kyrdan Grade 3 wa Grade 4.
Deiwa leh kamni, i thmu ka sorkar toh wow ran dien na i kitkhlieh neibhah i bha i miat kiwa kreh mylla wei da noh ya ki ha ki kti lehbor ki bru samen ki wow ksih beiñ yei hok yong ki kam kiwa mylla.
Katwa ka Fifth Pay Commission da pynku tulop ko ya ki wakreh pura ka sorkar tangwa kiwa mylla sngi, ki wakreh yung, kwai kreh kynta wot hadooh ki tu wa ha ki ophis sorkar kam ki adhoc næ kiwa kreh chipor (Contract Basis), ka sorkar ym em pyrkhat ko ya ki.
Da yoo leh ya i leh chilliang næ ka kheiñ chilliang khmat ka sorkar kawa pynyapher hei yoh bai mylla hapyrdi kiwa kreh sorkar wa kiwi tawon kiwa mylla. Katkam ka aiñ ki wakreh mylla (Minimum Wage) kam ki wa kreh yong kynta man ko 189 tyngka chi sngi katwa kiwa kreh sorkar kiwa khian kyrdan tam yoh ki hadooh kamwa T. 566 chi sngi.
Ini i yaphær daw ktah ko chiboon wei daw phiah kyrdan ko ya ka imlang sahlang wei daw wanrah ko chiboon i sñiaw yaphær para bru para wa kreh mylla. Neini i daw ka sorkar toh u pynkrehkaam ko chi syndon ya ka hukum ka Supreme Court wow su nongsngi wa mar ryngkat neibynta i jooh i kreh lada man i yong ka sorkar namo yong samen (Equal pay for equal work).
Kamtæ ka TUR khut ko ya waroh kiwa kreh mylla wow yieñ ki pyrchah yei pyrchang ki bor sorkar wa ki bor samen kamjooh yow pynku ya ka bai mylla ki wakreh mylla sngi ki wymtoh kiwa kreh sorkar wow pynku ya ka T. 189 cha ka T. 560 katkam ka aiñ Minimum Wage Act.
Discussion about this post