New Delhi: Kam chibynta wow khang ya ki lieñsuiñ wow wan na ki thaaiñ loom yong u pood wa ka ri Pakistan wa China, ka Ministry of Defence (MoD) da pynkhreh ko wow thied ya ar Regiment ki naamdiñ Akash Prime Missile ya kiwa ye u pynkrehkaam ha ki thaw wa jrong palat 15,000 Feet.
Kini ki Akash wa thymme dang ye ki wow leh bha palat ya kiwi tawon ki naamdiñ kiwa da pynemkaam chwa da ka ri kiwa ye wow pynemkaam kam ha Ladakh kawa man ka thaw wa em u pood wa ka Pakistan wa China.
Katkam i ong ki heh ka MoD, lada thied ya kini ki naamdiñ daw kynjoh i dor hadooh kamwa T. 10,000 klur.
Ya ini i thmu daw yaklam yaphyllu yumut bha ha ka yalang ka Defence Acquisition Council hadien wa wan uiñ u khlieh ka Indian Army, u Bipin Rawat wa u montri ka kaam yada ri, u Rajnath Singh na Ladakh.
Ka Akash Missile System toh kawa da chna hapoh ka ri da ka DRDO heiwa ka Indian Army da em chwa ko ar Regiment kini ki naamdiñ wei yooluti ko wow chim sa ar Regiment wow booh ha khappood ka Pakistan wa China.
Chwa ini da thmu wow thied ya ar tylli ki Regiment yong ki naamdiñ na baar ri, tangwa da pynkylla noh lyngba i thong krehkaam ka sorkar pyrdi kawa ong `Make in India`.
Ka Defence Research and Development Organisation (DRDO) da siat ko ya u AKASH-MK-1S, u naamdiñ Surface to Air Missile na ITR, Chandipur, Odhisa ha ka 25 wa 27 Naisan uni u snem wei da pynyoo sakhiat u wa ye u wow kynjoh ya ka thong wa da booh wow krehkaam u.
Discussion about this post