U Montri wa pait ya ka chnat Transport ha ka jylla, u Dasakhiatbha Lamare da khana u wa ka sorkar jylla da em ko yei thmu wow lai chakhmat yow chna ya ka luti rel, tangwa hachwa wow lai chakhmat daw yaklam chwa leh wa ki liang wa pyrchah wa kitu waroh kiwa embynta.
Hawa jubab yeiwa kylli da u MLA na Nongpoh, u Mayralborn Syiem hapoh ka dorbar ynne, u Montri da ong u wa ya katni ym em i pynkreh ya ka luti rel hapoh ka jylla, tangwa da khana wa ka sorkar da dep ko wow su yei thaw neibynta ka luti rel wa jrong kamwa 2.5 Km ha Byrnihat.
Da khana u leh wa da em i ban na ka sorkar pyrdi wow lai chakhmat yow chna ya ka luti rel. Tangwa da ong wa neidaw wa em i pyrchah hajrong ini i kaam, kamtæ neiliang ka sorkar jylla daw yaklam chwa ki wa kini kiwa pyrchah wei hadien itæ daw lai chakhmat.
Neiliang u Mayral hawa kylli chooh chooh, da ong wa ka luti rel toh kawa emkaam, neibhah wa man ko kam u thiedsnaam (Lifeline) i yoh i kot ka jylla, tangwa emkaam ki aiñ wow yada nei yoh psiah ki bru wa na baar, neibhah i pyrchah toh wa tieñ yei yoh psiah pyrchah aiñ kiwa na baar.
U Montri da ong u wa da em i tyrwa wow chna ya ka luti rel toh nadooh na Byrnihat chadooh Shillong, tangwa hadooh katni ym pu em tba næ ktah iyi iyi hawa yatoh wa ini. Da khana u leh wa i sorjamin wow pynpoi ya ka luti rel nadooh Tatellia, Assam hadooh Byrnihat wa Lailad toh iwa da dep wei da dep su leh ya ka bai thaw.
Hawa jubab lang hajrong kani ka phang, u Montri Rangbah ka jylla, u Conrad Kongal Sangma da ong u wa i tyrwa wow wanrah ya ka luti rel na Tatellia hadooh Byrnihat, neiliang yong ka Assam ym em lai smat bha. Da ong u leh wa da em ki yalang hajrong ini i kaam wei 2-3 snem nachwa da yaklam wow pynpoi du ya ka luti rel kit mar hadooh Byrnihat.
Da ong u wa ka sorkar ka kwah ko wow lai chakhmat wow chna ya ka luti rel wow yarap hei yoh i kot ki paidbah ka jylla, tangwa ka sorkar ka sñiawthooh ko leh yei sñiaw yong kiwa chong chnong wa ki seiñbhalang, wei da khana u wa da klam che cha u Montri ka sorkar India wa ka jylla daw lai chakhmat ya ka luti rel deiwa ya syllok lang wa waroh kiwa embynta.
Hawa jubab won ya ka NOC yong ka KHADC, u Dasakhiat da ong u wa i chim yei thaw neibynta wow chna ya ka luti rel da leh ha ki snem wa da slem nadooh i por wym emkaam wow chim ya ka NOC na ka KHADC.
