Ka dorbar chnong Mawsynram da chim rai ko wym e laad wa ka krem Mawjymbuiñ kawa man ka thaw uiñke suwari wa pawnaam ha ka thaaiñ wow kylla man ko kam ka thaw mane Blai yong kiwon kiwon. Kani ka rai yong ka dorbar chnong toh hadien wa kiwa ngait niam Hindu da thmu pynman thaw mane Blai ha katai ka krem kawa em ya u moo wa phylla uwa tip kam u Mawjymbuiñ.
Ka Executive Committee yong ka chnong ha ka 1 tarik uni u bnai da pynbna paidbah ko wym e laad de ya kiwon kiwon wow lai mane Blai ha katai ka krem.
Ini i rai wa ka dorbar chnong Mawsynram da chim ko, man ko leh hadien wa da em kiwa kwah u pynman yei lai kjat namo Yatra Pilgrimage ki Hindu, wei da thmu wow pynemkaam ya katai ka krem kam ka thaw mane Blai ha ka 10 wa 11 tarik uni u bnai deiwa paan bor na ka chnong, tangwa chwa wow paan bor na ka dorbar chnong, da lai paan bor chwa ki na ka yung krehkaam ka Deputy Commissioner ka East Khasi Hills.
Ka Dorbar chnong da pynsñiaw ko leh yei phylla wa kammon kini ki bru da lai lait ki ya ka dorbar chnong wei hadien wa ka Deputy Commissioner da kyntait ko wow e bor neidaw wa khlem da pyntip chwa cha ka chnong, neiliang kini ki bru da thoh won ki cha ka chnong.
U Assistant Rangbah Shnong ka Mawsynram, u Hiamdor Rapsang da khana u wa kini ki bru wa thmu wow pynman yei lai kjat namo ka Yatra Pilgrimage toh ha ka 3 wa 4 tarik, tangwa da kyrriah noh cha ka 10 wa 21 tarik uni u bnai, wei ka dorbar chnong daw khang pyrchah ko ha kitai ki sngi wei ym e laad ya kitai ki bru neibhah wa da yoh khubor wa da em ka ya pynlang paidbah yow toor cha ka krem Mawjymbuiñ.
Da ong u leh wa ka chnong da klam che ko leh wa ini i khang yong ka dorbar chnong ym mut wa ka dorbar chnong pyrchah ko yei mane blai ki Hindu, tangwa pyrchah bait ki du yei wan pynman yalang mane blai paidbah ha ka Krem Mawjymbuiñ neibhah katai ka thaw ymtoh ka thaw mane blai yong kiwon kiwon tangwa man ko du kam ka thaw uiñke suwari donhi.
U Hiamdor da ong u wa ini i khang ya ki bru wow wan pynman yalang mane blai paidbah, ymtoh wa da leh du ha dorbar chnong Mawsynram, tangwa kani ka jooh ka sur yong uwa boon walang wa kynthup na ki seiñ waphær waphær ka thaaiñ wa na kylleiñ ki chnong ki dong wa marjan ka Mawsynram.
Discussion about this post