Ka Balang Catholic ka Meghalaya da thoh ko cha ka 22nd Law Commission of India yow pynsñiaw yei pyrchah yei pynkrehkaam ya ka Uniform Civil Code (UCC) deiwa ong wa hapoh ka ri India da yoh ya ka riti synchaar kawa yada ya uwi pa uwi uwa chong chnong, kawa burom yei em boon jait ki jaitbru wa kamjooh leh kawa ym em leh chiliang ya kawon kawon ka niam.
Da ong leh wa ka ri India toh kawa chah ya ki aiñ yei kaam yong samen (Personal Laws) nadooh i chong kurim, i ya pynlait kurim, i yoh hiar pateiñ yei thaw i bhaw, i hot i pot wa kiwi kiwi tangwa i pynbna da ka 22nd Law Commission of India ha ka 14-06-23 yow pynkrehkaam ya ka UCC toh iwa sñiawkhia bha, kamtæ da pynsñiaw yei pyrchah yeini i neibhah:
Ki aiñ Personal Laws toh kiwa mih na ki dustur riti, i rukom im wei em leh kiwa yabi lang wa ka niam ki wym toh u chah pynkylla pynwiar deiwa wan ka UCC, kamtæ da pyrchah wow wan ka UCC wow em du ka donhi ka wow ban lut ya ini waroh i jait iwa da jooh myllien ha ki dustur riti wa ki niam ki rukom neibhah ka Article 25 da e ko i hok ya kiwon kiwon ki jait niam wow pait ki ya jar jiar i kaam yong ki.
Chooh chooh da ong wa hapoh ka Constitution ka ri India itæ hapoh ka Article 341 wa 342 waka Sixth Schedule da booh ki kyndon yow pynkupbor ya ki jaitbru ri-loom wei deiwa wan ka UCC daw tympra ko ya ini waroh iwa da e kyrpang cha uwi pa uwi u jaitbru ri-loom.
Da pynkynmoo leh wa ka 21st Law Commission ha u 2018 da ong ko wa ym emkaam wow pynkrehkaam ya ka Uniform Civil Code tangwa ileh won katni kani ka sorkar da kwah ko wow pynkrehkaam ya ka UCC.
Hajrong ini waroh da pynsñiaw yei pyrchah.
Ya ka chithi da soi da u Archbishop ka Shillong, u Auxiliary Bishop ka Tura, u Bishop ka Nongstoin wa u Bishop ka Jowai.
Discussion about this post