Ka seiñ EJNC da thoh ko cha u Chief Secretary ka jylla Meghalaya lyngba u DC ka East Jaiñtia Hills ynne ka sngi yow dawa pyndam ya ka Environmental Clearance wa da e cha ka Star Cement.
Ka seiñ da ong ko wa katkam ka EIA Notification 2006, i pynman ya ki Public Hearing namo ki pynsñiaw paidbah toh iwa emkaam heiwa la le sien da pyrchang wow pynman ya ka Public Hearing ha ka 19-10-2019, 31-01-2021 wa 21-11-2020 tangwa neidaw wa joor i pyrchah ki seiñbhalang wa ki bru paidbah, pyn le sien ym em yoh wow pynman ya ka Public Hearing. Ka seiñ da ong ko wa ini pynyoo ko wa ki paidbah pyrchah ki yei thmu ka Star Cement wow pynyaar ya ka paar tih moochuni neidaw wa daw ktah ko ya ka rymaw kamjooh i rukom im ki bru wa em ha kani ka thaaiñ.
Hanla joor i pyrchah leh, ka sorkar jylla lyngba u Deputy Commissioner wa ka Meghalaya Pollution Control Board da tyrwa ki cha ka sorkar India wow pynlait nei pynman ya ka Public Hearing. Kamtæ da ong wa ini toh i tyngkheiñ yei hok kamjooh ya ka aiñ.
Ka seiñ da ong ko leh wa ym ngait yei ong ka sorkar wa ym tip ko iyi iyi leh chaphang ini i e Environmental Clearance wei da leh du da ka sorkar India samen.
Hajrong ini, ka seiñ da ong wa ini toh i chet kylla ka sorkar ya ki paidbah kawa kwah du ya ka poisa na ki Company khlem da pyrkhat yei ktah ya ki paidbah lym kamtæ ileh kyrchaan ko ya ki karkhana kawa kjit ya ki marpohkhyndaw wei rah ki ya ki cha baar katwa ki tre chnong ym yoh nong ki iyi iyi leh iwa pynyoo wa kor i yoh nong ka Star Cement bar yei mynsien ki bru. Da kdaw leh wa lyngba ka Point No. 13 ka Environmental Clearance, da pnyoo wa u Deputy Commissioner toh uwa em hadien ini waroh wa yoh bor ka Star Cement.
Da khut leh ya ka sorkar wow wan pait ko ya ka Narpuh Elaka yow sñiawthooh hadooh katwon da chah ktah ka rymaw nei tih marpohkhyndaw kamjooh da ki Cement Factory deiwa nujor wa kammon man ko 20 snem nachwa.
