Ka Harijan Panchayat Committee yong ka Harijan Colony, Shillong da thoh ko cha u Home Minister ka ri, u Amit Shah yow tuklar ka sorkar yeiwa jia i pdung Bomb IED hei miet ka 9 tarik ha Punjabi Colony iwa da chah ktah ki yung ki sem wa em hajan ini i thaw wa pdung Bomb wei da ong leh wa ini i pdung Bomb toh iwa da jia hei thaw wow psiah cha ka Punjabi Colony.
Da khana leh cha u Amit Shah wa i chram, ki yit deilang ki dukan da chah ktah kamjooh i poi umkor cha kani ka thaaiñ heiwa uwi uwa yaleh Cricket ka jylla Meghalaya, u Lakhan Sing da mynsoo u na ini i jia uwa sah ha ini i thaw.
Da ong ki leh wa ki Sikh wa sah ha kani ka Punjabi Colony toh kiwa da chah maham ha kiwa boon ki seiñ ki jaitbru ri-loom nadooh iwa da jia ha u 2018 wei kini ki seiñ da klam che ki wym kwah ki wow em ki jaitbru wym toh kiwa man kam ki jaitbru ri-loom ha Meghalaya iwa da pyntieñ pynsier wei da jia leh i chah tbakti ki Sikh tangwa kini kiwa emkti ym em chah pynchitom ki.
Chooh chooh da ong wa i hok yong ki kiwa sah ha kani ka thaw toh kawa dang em hapoh i bichaar ka High Court wei dang yaklam pynbait leh katni hapyrdi ka Harijan Panchayat Committee yow pynbait yeini i kaam tangwa wot hadien i yachem i yaklam wa boonsien ym pu ye u pynkut yeini i kaam wei wot i kular ka sorkar pyrdi wow tuklar leh toh iwa da khlem leh neibhah ngait skem ki wa ka sorkar pyrdi toh kawa ye u pynbait yeini i kaam.
Heiyatoh wa ini i tympdung Bomb da ong wa da em kiwa kwah wow pynthut yei wanrah yei suk wei kam ini i jia ymtoh iwa dang ini hadooh wym sñiaw chngaaiñ de ki khian paaid ha Meghalaya wei deiwa yoh u kem ya kiwa emkti pynoo ko wa em kiwa kwah wow pyntieñ ya kiwa sah ka Punjabi Colony.
Da pynsñiaw ki leh yei sñiawkhia wym em uwi leh napoh ka sorkar, nadooh u Montri Rangbah cha wah kiwa beiñ ya ini wa jia hadooh katni wei ym em leh wa wan hiar yow lait pait ya ini i thaw wa jia.
Kamtæ da kyrpaad yaka sorkar India wow leh smat ko wow chim rai wow takit yeini wa jia wei wow pynchitom ya kini kiwa emkti kiwa maham ya ki Non-Tribal ka jylla, wei daw yoh yei suk du deiwa pynchitom ya kini kiwa pynkulmar heithaw wow tlep donhi yeini i kaam.
Kam kiwa chong chnong ka Punjabi Colony da ong ki wa kwah ki wow im dei suk deiwa leh yei bynta yong ki neibynta ka imlang sahlang iwa da dep leh ki da boon boon pateiñ wei ka sorkar pyrdi toh i kaamram ko wow yada yei hok kiwa chong chnong wei wow tuklar yow phah yaka khubor wa che cha kitu kiwa kwah wow wanrah yei sñiaw yaphær jaitbru hapoh ka imlang sahlang.
Discussion about this post