Ka seiñ HITO da thoh cha u Montri Rangbahdooh ka ri, u Narendra Modi yow dawa phah tuklar da ka Central Bureau of Investigation (CBI) hajrong i chalan pyrchah ya ka aiñ ya u mooyong da ki Meghalaya Coal Mafia kiwa yajan bha wa ki bru wa em hei bor iwa da ktah yei krehkaam yong waroh wa kynthup ya ki pulit ka Meghalaya.
Ka seiñ da ong ko wa nadooh wa khang ka NGT yei tih mooyong (Rat Hole Mining) hapoh ka jylla nadooh u 2014 da em i chalan tooh ya u mooyong da ki phaw hajar Ton neidaw wym lait ka jylla na ki aiñ kam ka Coal Mines Nationalization Act 1973 waka Forest Conservation Act 1980 iwa da tyngkhooh leh waka Instrument of Accession heiwa ki marpohkhyndaw toh u man ki ki yong ki tre thaw.
Tangwa neidaw wym em da ka aiñ wow pynche yeini da wanrah ko yei chalan tooh ya u mooyong ka Meghalaya cha Assam wa Bangladesh iwa da pyndooh nong ya ka jylla da ki spah klur.
Chooh chooh da ong wa waroh tip ki wa em hi i tih mooyong pyrchah ya ka aiñ kamjooh wow chalan nadooh u snem 2014 heiwa na ki por cha ki por da jooh kylla kini ki truck kit mooyong.
Kamtæ da ong wa ini i kaam pyrchah aiñ da pyndooh nong i hadooh kattæ kattæ ya ka jylla kawa da dooh chwa wei da emkaam ya ka CBI wow tuklar ko yeini i kaam wa da emkti lang da kiwa hakhlieh dooh ka sorkar wa ki pulit ka jylla Assam wa Meghalaya.
Ka seiñ da e nongmuna ko leh ya kiwa boon ki kaam wa da jia heiyatoh wa u mooyong nadooh i rukom yap uwi u pulit ka Patharkhmah Out-Post Ri-Bhoi hadien wa ksoh u ya 32 tylli ki truck wa kit mooyong pyrchah ya ka aiñ, i chah dat ka Agnes Kharshiing waka Amita Sangma, i chah kset ki 15 ngut kiwa tih mooyong ha Ksan hadien wa chlai um ka krem mooyong, i mih pyrtuid u Vincent Pala, MP wa 7 ngut ki MLA ha ka Citizen’s Report wa da e cha ka Supreme Court da u Colin Gonsalves uwa man kam u Amicus Curiae ha ka mukotduma mooyong heiwa kani ka Report da ong wa kini kiwa mihkhmat paidbah toh kiwa emkti hei khih mooyong.
