Ka seiñ Hynniewtrep Youth Council (HYC) Jaiñtia Hills District Unit, hapoh i yahkhmat u Phaitki Suna uwa man kam u Organising Secretary wa u Yodahunki Shylla kam u Vice President, ynne ka sngi da thoh ki cha u montri ka chnat puræ puthi ka jylla lyngba u DC ka West Jaiñtia Hills District, wow pynsñiaw hajrong i eh i khoo ki khynnah skur ka jylla waroh kawi.
Neiliang ka seiñ da ban joor ko wa i eh i khoo wa chem ki khynnah toh kiwa sah cha ki thaaiñ palatsor kiwa wan na ki manyung wa duna hei yoh i la neibhah wa ym biang ka Network wa kamjooh ka bordiñ.
Ha ka dorkhat, ka seiñ da kyntu ko ya ka sorkar wow chah ya ki khynnah wow lai thoh Exam cha ki thaw puræ yong ki neibhah wa chem chitom ki wow thoh ha ki chnong yong ki hi khamtam neidaw wym biang ka Network neibhah wa da booh wow pyndep ya ka Exam du hapoh 3 kynta wei lada thut ka Network da chem chitom ki.
Neiliang ka seiñ da kyntu ko ya ka sorkar wa ka jylla wow elaad noh leh ya ki kari kamai wow lai ki na kawi ka District cha kawi tawon khnang wow yoh laad ki khynnah u lai thoh ya ki Exam yong ki neibhah wa rap biang ka Network ha sor næ khapsor.
Chooh chooh da kyntu ko leh ya u montri wow pyrkhat neibynta i bha i miat ki khynnah puræ yong ka jylla waroh kawi khnang wow pyntikna wa i puræ puthi ka jylla ym hiar i kat dang mih ki snem.
