Hadien wa chah pynmynsoo wei chah tynyap ki Hindu wa em ha Bangladesh heiwa da em kamwa 200 ngut ki bru wa da lai tympra ki ya ki Temple ka ISKCON wa em ha thaaiñ Naokhali ka Bangladesh, neiliang ka International Society for Krishna Consciousness (ISKCON) da ujor ko cha u United Nations, Secretary General ynnin ka sngi.
Kani ka seiñ da ong ko wa i chah tba kti ki Hindu ha Bangladesh toh iwa da jia la 9 sngi, kamtæ da lai rah ha u UN General Secretary, u Antonio Guterres yow chimkhia u ya ini.
Ha ka sngi Thohdieñ da joor ini i kaam heiwa kamwa 200 ngut ki bru da lai ki cha i thaw ka ISKCON wa em ha Naokhali heiwa da tympiah, da pynsih ya ka Temple wei da lute leh ya ki yung ki para wa ngait niam.
Ha ka ujor ka ISKCON, da ong wa da em leh kiwa yap ha ini i jia wei boon ngut da wiar ki.
Ha i step ka 16 tarik da chem yei metyap u Partha Das (25 snem) napoh ka ISKCON Ashram. Heiwa ka ISKCON da ong wa da chah dung u.
Ka ISKCON ha ka ujor cha ka UN da ong wa em kiwa chah salitbor naka jooh ka yung wa kynthup ya kawa dang 10 snem.
Da em leh ka khubor wa mih wa kiwa yap da em ki waroh arngut hadien wa chem sei metyap yong uwi najan ka nan wa em hajan ka Temple.
Ini i chah tba kti ki Hindu da sdang i hadien wa em wa pynbaad wa em ki wym burom ya ka kot niam Muslim ka Quran deiwa booh ka ha i khlieh kyrsu ka dur Blai ka Durja ha kawi ka Puja Pandal iwa da poi chei pyrchah kiwa boon hapoh ka ri Bangladesh kawa boon da ki Muslim wei i chrai ya ki Hindu da poor i cha kylleiñ ka Bangladesh kam ha Noakhali, Chandpur, Cox’s Bazaar, Chattogram, Chapainawabganj, Pabna, Moulvibazar wa Kurigram.
Neiliang ka Prime Minister ka Bangladesh, ka Sheikh Hasina da kular ko wow pynchitom ya kiwa emkti hawa klam wa ki Hindu ha ka yalang wa pynman ha Dhakeshwari National Temple ha Dhaka.
