Ka Jaiñtia Students’ Union (JSU) da thoh ko cha u Member Secretary ka Law Commission of India yow pyrchah yei pynkrehkaam ya ka Uniform Civil Code (UCC) kawa daw ktah bha ya ka riti dustur wa i rukom im ki jaitbru ri-loom wa em ha Khasi wa Jaiñtia Hills ka jylla Meghalaya.
Ka JSU da ong ko wa ki daw wa pyrchah ko toh wa ka UCC ym em de pyrkhat ko yeiwa emkaam ki jaitbru deiwa tymmoh bait da kawi donhi ka aiñ neibhah kiwa boon ki jaitbru em ki jar jiar i emkaam wa ki rukom wa bood ki wei lada em du kawi donhi ka aiñ daw dooh leh ki dustur riti.
Da ong leh wa ka UCC daw ktah ko wot yaka Sixth Schedule kawa pait kyrpang ya ki thaw wa sah ki jaitbru ri-loom kam ha Assam, Meghalaya, Tripura, Assam wa Mizoram kiwa em ya ki Autonomous Council yow chna aiñ yow yada ya ki thaw ki bhaw, ki khloo ki kjam, ka dustur riti iwa mut wa ka UCC ye ko wow pyntlot yei bor ka Sixth Schedule iwa daw ktah kylla yei man kyrpang ki jaitbru ri-loom.
Ka seiñ da kdaw ko leh yei laitlooid u jied ya ka niam wei kani ka UCC daw ktah ko leh yeini neibhah jar jiar ka niam em ko jar jiar ki rukom nadooh i rukom chong kurim wei em leh kiwa bood yaka niam kawa man leh kam ka dustur riti heijooh i por.
Kamtæ da ong wa lada pynkrehkaam kawi donhi ka aiñ ka wow pait nadooh i rukom chongkha chongman, i rukom yalait kurim toh iwa eh bha neibhah hapoh ka ri India em boon ki jaitbru wa im da jar jiar i rukom nadooh ka dustur riti kiwa nadooh wa rim wa jah wei lada wan ka UCC daw pynkulmar ko ya waroh plak wei daw mih leh boon i pyrchah kamjooh i chitom ha ka synchaar khadar.
Hajrong ini waroh, ka JSU da ong ko wa emkaam u burom yei sñiaw yong kiwa boon ki jaitbru dei wym toh u pyndooh yei hok yong kiwon kiwon wa em hapoh ka ri India wei iwa emkaam toh u yada yei hok yong ki waroh.
