Ka JSU da thoh ko cha u Montri Rangbah ka jylla, u Conrad Sangma kamjooh cha u Montri ka chnat Puræ Puthi, u Lahkmen Rymbui wa cha u Montri ka chnat Aiñ, u James Sangma wow dawa booh ya ka National Law School hapoh ri-loom Jaiñtia hadien wa da dep ka sorkar wow mynjur ya ka National Law University Ordinance 2022.
Ka seiñ da ong ko wa hapoh ri-loom Jaiñtia ym em ko tang ka wi ka chlem puræ wa pawnaam kawa heh kyrdan wot hadien 50 snem i yoh jylla katwa cha ri-loom Khasi wa Garo won da em ki ya ka North Eastern Hill University (NEHU)-Shillong wa Tura Campus, ka Indian Institute of Management (IIM), Institute of Hotel Management (IHM), ka National Institute of Fashion Technology (NIFT), ka National Institute of Technology (NIT), ka North Eastern Indira Gandhi Regional Institute of Health & Medical Sciences (NEIGRIHMS), ka North Eastern Institute of Ayurveda & Homeopathy (NEIAH) wa kiwi kiwi de wei daw chna leh ya ki Govt. Medical wa Engineering College (Shillong Medical College, Tura Medical College, Shillong Engineering College, Diary and Veterinary College ha Ri-Bhoi District waka Fishery College ha Garo Hills).
Kamtæ da ong wa ong wa ka ri-loom Jaiñtia toh kawa biang dooh wow booh ya kani ka National Law School deiwa e nongmuna wa da ye ko wow pynmih boon ki muktiar wa pawnaam wei da em ko leh ya ka 12 Daloi Law College ha Jowai kawa da yarap wow e sikai heiyatoh waka aiñ hanla man ko kawa dang khian wei boon i duna.
Hajrong ini waroh da dawa wow booh ya kani ka Law School ha ri-loom Jaiñtia kawa daw yarap leh ya kiwa chong chnong ka jylla.
