Ka Dorbar Chnong Khanduli da thoh ko cha u Deputy Commissioner ka West Jaiñtia Hills District yow pynsñiaw yei pyrchah joor yei thmu ka sorkar Assam wow chna ya ka University hapoh ka thaaiñ Khanduli heiwa da yoo khubor ki wa u Rupsing Teron, MLA ka Boithalangso, Assam wa ki MAC ka Karbi Anglong Autonomous Council deilang wa ki sahep yong ki da lai pait ki ya i thaw wa em ha Khanduli wei da pynbna paidbah leh wa daw booh da ka University ha Khanduli.
Da ong leh wa neidaw u MLA da pynbna u wa i heh i thaw wow booh ya ka University u man ko hadooh 5000 Acre wei khlem pep ini daw kynthup lang ko ya ka chnong Khanduli wei ini da pynkhyrngiat wei da pynchrai ko ya kiwa chong chnong iwa man leh kam i toor pood cha i thaw yong ki.
Neiliang ka chnong yow tip ko wa kiwon ki thaw wow em hapoh ini i thmu wow chna ya ka University, da pynman ki yei lai pait lang wa u Officer In-charge ka Police Outpost Saitsama u P. Najiar ha ka 04-06-21 cha ki khappood ka chnong Khanduli wei katkam i chem itai i lai pait da yoosar wa itai i thaw toh iwa haap ha Pdeinsalait iwa em leh hapoh u pood u ang yong ka chnong Khanduli.
Kamtæ ka Dorbar Chnong Khanduli da pyrchah joor ko yeini i thmu wow booh University da ka sorkar Assam hapoh u pood u ang ka chnong Khanduli wei da kyrpaad ya u DC wow sñiawbha u pynsangeh chi syndon yeini i thmu booh University.
Ka kyrwoh na u Waheh Chnong, Chairman Chnong wa Secretary Chnong ka Khanduli.
