Ka KSU-Jaiñtia Hills District Unit da toh ko cha u Prakash Javadekar u Montri ka sorkar pyrdi wa pait ya ka chnat Ministry of Environment, Forest & Climate Change yow pyrchah wei wow dawa pyndam ya ka Environmental Clearance wa da e cha ka Star Cement.
Ka seiñ da ong ko wa i e ya kani ka Environmental Clearance yow tih moochuni ha Brichyrnot, East Jaiñtia Hills toh khlem da pynman ya ka Public Hearing heiwa ka MSPCB da pyrchang ko wow pynman Public Hearing la le sien tangwa ym em ye neidaw wa joor pyrchah ki paidbah ka thaaiñ deilang wa kiwa boon ki seiñ neidaw wa da dep chah ktah chwa ka rymaw nei tih marpohkhyndaw wei i em ki karkhana ha kini ki thaw.
Da ong leh wa kiwa chong chnong ka Elaka Narpuh leh pyrchah ki ya ka Star Cement neidaw wa ini i tih moochuni daw ktah i ya ka rymaw wa waroh kiwa em hapoh yong ka nadooh ki bru hadooh ki mrad.
Ka seiñ da kdaw ko leh yei kam wa em 280 tylli ki pyrtuid kiwa e dei thoh wa kyrchaan ya ka Star Cement deilang wa ki NGO ki wym jooh sñiaw ki wym em pyrtuid u President/Secretary wei ym yoo tikna wa em sakhiat kam kini ki seiñ.
Chooh chooh da ong wa lada sdang wow tih ya u moochuni daw ktah ko ya 15 tylli ki chnong wa em chajan heiwa haka Public Hearing wa pynman khaddooh da pynman 25 Km jngai na i thaw wa thmu wow tih ya u moochuni iwa pynyoo yei em iyi iyi i thmu wa cha kylla da ki bor District wa ka State Pollution Control Board.
Da pynkynmoo leh yei em ka Narpuh Wildlife Sanctuary kamjooh ka Eco Sensitive Zone kawa em pyn chajan kani ka thaw tih moochuni kamjooh ka Wah Lunaw, ka Umso Nallah waka Wah Lukha kiwa da chah ktah chwa nei tih marpohkhyndaw.
