Jowai: Ka Khasi Students’ Union (KSU) da thoh ko cha ka Wansuk Syiem ka MP ka Rajya Sabha hei yatoh i pyrchang ka sorkar India wow pynman aiñ ya ka Citizen (Amendment) Bill 2016 deiwa pynsñiaw yei pyrchah yong ki ya kani ka Bill kawa booh ya ki jaitbru wa khian paaid hei ma.
Ka KSU da ong ko wa kani ka Bill u e hok ko yow man tre ri ki Hindu, Christian, Jain, Buddhist, Sikh kiwa na ri Afghanistan, Pakistan wa Bangladesh; iwa da booh nyngkong ya ki jaitbru khian paaid ki jylla ka thaaiñ mihsngi hei ma wa kynthup lang ya ki Khasi hei ma nadooh wow im ka jaitbru, ka dustur riti, ka ktien ka thylliej, ka imlang sahlang, ka khayi pateiñ wa kiwi kiwi.
Ka KSU da ong ko wa ym em pyrchah ko yei leh ka sorkar India hajrong ka yurim wow yarap para bru tangwa kani ka Bill ym em pyrkhat ko ya ki jaitbru wa boon jait hapoh ka ri kiwa em hajan ka ri Bangladesh kawa em boon ki Hindu kiwa da poi hadooh 1.40 Klur kiwa ye u wan tymmoh ya ka thaaiñ mihsngi waroh kawi. Ka Meghalaya khamtam kawa em u pood wa jrong waka Bangladesh wei kawa da maad chwa yei wan hiar kiwa boon na Nepal wa na Bangladesh lyngba Indo-Nepal Friendship Treaty 1950 wa heipor ka thma lait looid ka Bangladesh ha u snem 1971.
The KSU da pyntip ko leh wa deilang waka North East Students’ Organisation (NESO), All Assam Students’ Union (AASU), All Arunachal Pradesh Students’ Union (AAPSU), All Manipur Students’ Union (AMSU), Naga Students’ Federation (NSF), Garo Students’ Union (GSU), Twipra Students’ Federation (TSF) wa ka Mizo Zirlai Pawl (MZP) da dep pynman ki boon ki yakhih jai jai nadooh ynnin u snem pyrchah ya kani ka Bill.
Kamtæ ka KSU da kyrpaad ko ya kawa mihkhmat ka jaitbru wow kyntait ya kani ka Bill hapoh ka Rajya Sabha wei wow yaklam ko leh ya kiwi ki MP na waroh ki Party wow kyntait lang ki waroh ya kani ka Bill.
Discussion about this post