Hadien wa em ki bru wa psiah tooh chapoh West Garo Hills District hadooh wa poor u khñiang COVID-19, neiliang u DC ka District da thoh u cha u DC ka Dhubri Assam wa cha u DC ka South Salmara Mankachar District yow pyntip cha ki wa i psiah chapoh Meghalaya da chah du ya ki tre jylla wei du ha ki thaw wa da booh kam ha Tikrikilla wa Berubari kiwa man ki thaw psiah cha ri-loom Garo.
Da ong u leh wa da thoh cha kini ki DC neidaw wa da em kawi ka bru kawa wan daka lieñ klem da pyntip cha ki bor District wei da sah ko wa kiwa emyatoh ko ha West Garo Hills wei hadien da chem wa toh kawa yoh COVID-19 wei da yabi leh cha kiwi.
Kamtæ da kyntu u yaki DC ka Assam wow chimkhia u pyntip cha ka chnat Transport yong ki yow dam u kit yaki bru ka Meghalaya daka Bus lane daki lieñ wei kitu kiwa kwah u psiah cha Garo Hills emkaam ki wow yoh yaka e-Transit wei ye ki wow lai daki kari yong samen lyngba ki thaw wa da booh kam ha Tikrikilla ha West Garo Hills District wa ha Berubari ha North Garo Hills District.
U DC da pyntip u leh cha ki bru paidbah kiwa da yoh bor wow psiah lyngba ki Entry Point wa ha Berubari da wai nadooh 5AM hadooh 7PM wa ha Tikrikilla nadooh 7AM hadooh 7PM.
Ki paidbah ym toh u chim ki da kiwi ki luti wow psiah lyngba ka Assam kam daka lien na Dhubri wa na Mankachar. Kiwon kiwon kiwa psiah pyrchah yaka aiñ kamjooh deiwa khlem leh yaki Test, ki Quarantine daw pynchitom yaki kamjooh ya kitu kiwa murieh ya kini ki bru wa psiah tooh. Ye leh wow pyntip cha ki pulit, BDO waki Magistrate lada em wa chem ya kam kini.
