U Montri wa pait ya ka chnat Puræ Puthi ha ka jylla, u Rakkam A Sangma da ong u wa i pyrchah ka Voice of the People Party (VPP) ya ki kot puræ kiwa da leh da ka sorkar ymtoh kayi kayi tangwa man ko du kam wow chim kabu neibhah wa da jan ka Election MDC.
Hawa klam ynnin ka sngi, u Rakkam da ong u wym sñiawthooh u iyi mut ka VPP hajrong ini i pyrchah, neibhah wa ya ki kot puræ da bood na ka National Council of Educational Research and Training (NCERT) yow pynbha yei puræ puthi ha ka jylla yow yaryngkat kyrdan ha ka ri.
Da ong u wa i klam ka VPP ye u man neidaw wa ka Election, neibhah hawa em Election daw pyrchang wow thooh daw deiwa pynbaad ya iwon iwon. Da ong u leh wa heithaw wow pynbaad u kynthah ya kiwi daw bha wow e yumut neibhah deiwa pynbaad ya kiwi ym ye wow pynbor ya ki paidbah wow jied.
“Kam kiwa yahkhmat heithaw wow wohnia, toh u e yumut ki kammon wow kyntu ya ka jylla. I pynbaad ya kiwi ym khriñ ko ya kiwi wow jied ya phi neibhah wa i woh i boh ym pynmyntoi ko iyi iyi”, da ong u Rakkam.
Ini wa dep, uwa e ktien ka VPP, u Batskhem Myrboh da dawa u wa ka sorkar toh u kylliang noh ko ya u Montri ka chnat Puræ Puthi neibhah ym tip u kammon wow pynlai ya ka puræ puthi hapoh ka jylla.
U Batskhem da kylli u leh yei thong wa u Montri thmu u wow jop deiwa wanrah ya ki kot batai ‘Guide books’ ya ki khynnah puræ wa kiwa sikai, wa lada ini toh i pyrchang wow thooh da ka luti wa tbian na i rukom sikai yow pynboon hi-eh ya kiwa Pass ki wym ler iyi iyi. Da ong u wa i stat toh u lai ko jai jai wei da kdaw u yeini nei rukom sikai ym du ka Result yong ki Exam.
Hawa kynthah chooh chooh hajrong i klam uwa yahkhmat ka VPP, u Rakkam da ong u wym em da yoo yei pyrchah na kiwi won.
“Ki kot puræ da pynkylla na ka MBOSE cha ka NCERT. Nga khlem yoh O iwon iwon i pyrchah na kiwon kiwon ki bru, nadooh ki bru wa puræ kot, kiwa lai puræ wa na kiwa sikai”, da ong u Rakkam deiwa pynrap chooh chooh deiwa ong wa ini i klam yong ka VPP toh du neidaw ka Election wow yahbkla ya ki paidbah.
Discussion about this post