Ka seiñ HYC da ong ko wa ka sorkar jylla duna wei ym em poisa ko wot tang wow su ya ka tulop kiwa sikai wa kiwi kiwi, ymye ko wot wow wanrah ya ki kaam pynroi wei wow yarap ya ki bru wa kiwi ki kaam heiwa da chaniah ko du na ka sorkar pyrdi donhi wei da yoo wa ki Montri da lai ki cha Delhi wow kyrpaad ya ki Montri ka sorkar India wow pynlait poisa ya ka wei ini da chah klam beiñ ka jylla ha kiwa boon.
Da ong ko wa ka jylla Meghalaya dei langær da chim ko ya ki ram heiwa ka sut leh man ko kawa heh hajrong wa chim ko ya ki dan wa ki bai (Fees) kreh wa boonjait.
Hajrong ini ka seiñ da kylli ko cheiwon ka poisa wa pylnang ka sorkar heiwa ka tulop kiwa kreh man ko kawa khian hawa wyrchaw wa kiwi ki jylla wa ki yong ka sorkar India.
Toh hi mo wa ka da pynlutphut ko wow su heh tulop du cha ki Chairman, Co-chairman, Vice chairman, Adviser, Member ki Board, ki Committee wa ki Commission waphær waphær.
Toh hi mo wa da pynlut khiar du wow su Bill cha ki Contractor/Supplier kamwa jia ha ka Scheme Subhagya wa Smart Meter na ka cnat MeECL.
Toh hi mo wa da boon ware ki Black Bill (i rukom e Bill cha ki Contractor/Supplier ya i kaam wa khlem kreh) mo ha ki tamasa wa ki kaam wym phoida næ ya tooh rieh da ki bru wa em hei bor.
Ka seiñ da artatien ko leh deiwa ong wa boi i duna poisa ye i wow man neidaw wa ka sorkar Meghalaya ymye ko wow pynlang chiboon ka dan nei kheiñstiñ wa i baamrieh iwa wanrah yei laitrood ka poisa (Leakage) deiwa e nongmuna wa ha kini ki 4 snem kammon wa da pynemkaam da ka jooh ka Challan da ki spah ki hajar sien hei wow kit ya u mooyong wa kiwi ki mar poh-khyndaw ya kiwa da kit tooh leh dei langær.
“I wym pynchitom ya ki bru wa emkti ha ini i pynlutphut, i baamrieh ya ka dan ka jylla pynman i ya ka jylla wow duna poisa ko wei ini da pynchlur i ya kini ki bru wow pynjoor ki ya ini i kaam pyrchah aiñ ki,” da ong ka HYC.
Ka HYC, dei sñiawkhia da dawa ko na ka sorkar Meghalaya wow thung noh da ka Independent Commission wow takit liang wanang hajrong i daw wa duna poisa ka sorkar jylla wei u chem ya i rukom pynemkaam bakla ya ya ka poisa sorkar.
Da ong ko leh wa kani ka Commission u e yumut ko leh kammon wow kyntu kynrong ya ka jylla neibhah ymtoh de i por wow rah ya ka kyllung wow khrong cha Delhi ya ki kaam wa yatoh wa ka jylla.
“I por da emkaam wow pynkhlan chooh chooh ya ka aiñ wa ya i bor kam ka Lokayukta wei wot ka kasari wow leh ko yeiwa emkaam katkam wa yoobiang ko,” da ong ka HYC.
Da ong ko leh wa da emkaam ya ki Vigillance Commitee kiwa khlan nadooh na chnong chadooh chawi neibhah ka seiñ kamwa man ki paidbah ka jylla khmiet wei kyruiñ ki cha ka sorkar wow tyrchaaiñ ka mynried mankawi.
