Ka Dorbar Chnong Chilliangraij chirup i ya krehlang wa ka Social Forestry Division, West Jaiñtia Hills kam chibynta i kynmoo ya ka sngi kyrpang yong ka rymaw næ ka World Environment Day, ha ka 5 tarik Naiynru da pynman ki yei thung dieñ ha Lahong kawi na ki bynta wa man i rood ka wah Myntdu wa haap hapoh u pood u ang ka chnong Chilliangraij.
Chwa wow sdang i thung dieñ da em ka yalang yahkhmat wa tbian hei pynlai u Riang Lanong, Symbood Waheh Chnong Chilliangraij wei da yoh leh yei klam i batai heiyatoh wa kani ka sngi na u Oriland Shylla, Assistant General Secretary wa kamjooh na u B. Sana, Forester Social Forestry katwa u S. Sungoh, Treasurer ka Dorbar Chnong hawa kut e u ki kyntien khublei.
U Oriland hawa klam da khana u wa ka Dorbar Chnong na ki por cha ki por chimkhia ko wow leh ki kaam ha ka thong wow wanrah yei khooid i pliah, i miat yirngam, i man i long ka Rymaw wei u pynneh ya ki sim ki doh wa ki khloo ki kjam, kamtæ yooluti u wa dei yakrehlang i thung ya kini ki dieñ u man i myntoi wa khroo ya ka chnong ka thaw ha ki por ki sngi wow wan.
Neiliang u B. Sana, Forester Social Forestry da yaroh u ya ka Dorbar Chnong Chilliangraij wei kyrsu kyntu u leh wow thung chooh chiboon ki dieñ neibhah katkam ki stat sayan da ong wow yoh ya ka la-ær wa khooid wa biang u riñ u pynhiar mynsien uwi u bru emkam u soo tylli ki tre dieñ.
