Ka Sein Khynroo Dorbar Chnong Khimusniang da lehkmen ko yaka World Environment Day 2002 deiwa thung kamwa 105 tylli ki dieñ hapoh u pood u ang yong ka chnong Khimusniang.
Hachwa wow sdang yei thung dieñ da em ka yalang wa khian ha Basketball Court, Khimusniang kawa da pynlai da u Chairman yong ka Seiñ Khynroo Dorbar Chnong Khimusniang, u Khrawbor Bang. Ha kani ka yalang da emlang u Waheh Chnong, Dorbar Chnong Khimusniang, u A. Lamare kam u kongsan, kamjooh leh u Asstt. Waheh Chnong, u J.M. Pohsngap kam u symbood kongsan wa ki dkhot ka Seiñ Khynroo Dorbar Chnong Khimusniang wa kiwi tawon ki khynroo wa ki waheh.
U J.M. Pohsngap hawa e yei klam da khana u wa ya ka World Environment Day wa nyngkong da pynman ha u snem 1974 wei ka phang yong ka ha utai u snem wa ha uni u snem toh i jooh iwa ong ‘Only One Earth’. Da khana u waroh kawi ka pyrthai da leh warom ki ya ka World Environment Day man-u-snem lyngba ki kaam wa boon jait wei i thung dieñ man ko kam kawi na kini ki kaam.
Da ong u leh wa ka pyrthai em ko i sñiaw wa kammon i kiwa im katni u pyrkhat i yaka mynried deiwa thung yaki dieñ wei wymtoh u ieh mylliñ ya ki manda dep thung tangwa wow sumaar wow lai pait man-ka-sngi khnang wow im wow heh wow san ki, wei lada em kiwa yap hadien kattu katni por wow thung biang da kiwi. Da pteiñ chooh chooh u deiwa ong wow rah ya kani ka khubor cha yung cha sem wa cha kiwi tawon ki khynroo khyllood wym emlang ha kani ka yalang wow sñiawkhia ki ya kani ka kaam thung dieñ khnang yow yoh yaka la-ær wa khooid wa suba u riñ mynsien wa ya ka um ka wah kawa khooid.
Hawa pynkut da e khublei u ya ka Seiñ Khynroo yeiwa chimkhia ko u pynman ya kani ka yalang deiwa ong wa e wa kani ka lehkmen ya kani ka sngi u man ko ka khubor cha kiwi tawon wa i em i yei kitkhlieh ya kani ka sla pyrthai kawa im i katni neibynta ka mynstep mankawi yong ki khon i ksu yong i.
U A. Lamare, Waheh Chnong hawa e u yei klam yong oo da e khublei kyrpang u yaka Seiñ Khynroo wada chim ki ya kani ka luti wa emkaam bha khamtam ha kani ka pateiñ wa im i katni. Da ong u 50 snem nachwa ka phang man ko ka jooh ‘Only One Earth’ pynyoo wa ka United Nations sñiawkhia ko hadooh kattæ kattæ neibhah ym em pyrthai de da kawi tawon, “Hao sakhiat hawa im i ha pyrthai em kiwa im ha India, em cha Europe, USA wa chawi tawon, hawa im i ha jar jiar ki thaw sñiaw i kam wa im i ha ka yong i hi ka pyrthai neibhah wa ya jngai wei chem chitom u poi.”
Da pyn yasariem u yaka pyrthai wa ka yung paki dulan ka heh bha wa em boon kamra, ha kawa ki kamra man ki kam ki ri. Da ong u wa lada em uwa chong yong kawi ka kamra uwa leh sih leh tngit kani pynsih lane ktah ko ya waroh kawi ka yung. Kamjooh leh kani ka pyrthai wasah i katni em du kawi donhi, wei em ki bru ym sñiawthooh ki yei man kyllumlang yong i ki bru heini ha pyrthai.
Da ong u wa ka United Nation da pynman ko ya ki pynsñiawthooh paidbah ha man ki thaw kammon wow pynneh pynbha yaka rymaw, wei ki ri yong ka pyrthai da lehkmen ki ya kani ka World Environment Day ha ka 5 tarik man-u-snem. Da ong u leh wym hoi u kut ini i kynmoo ya kani ka sngi du chi sngi tangwa wow pteiñ neipor cheipor wei wow thung dieñ heiwon heiwon i thaw wa lait kam cha loom cha wah, ha yung ha sem neibhah ki dieñ ki siej man ki kiwa kordor hadooh kattæ kattæ wow yoh yaka la-ær wa ka um kawa khooid.
U Chairman ka Seiñ Khynroo da pynkut u yaka yalang dei wa e khublei ya waroh arngut kiwa yahkhmat yei por wa kordor wow wan cha ka yalang wa ya i klam wa kordor i yong ki iwa pynsñiawthooh yaki khon khynroo yei emkaam wow pynneh pynbha yaka rymaw wei kamjooh da e khublei u ya waroh ki khynroo wada wan cha ka yalang.
