Jowai: I sahkut kari ha u sarok Shillong-Jowai ha kini ki sngi da jia i khah khah kamjooh ynne leh da ki boon boon kynta, iwa da wanrah yei thut hei lai i wan ki paidbah kiwa hap u yabeh yei kaam i jaam yong ki wow lai thooh dawai dachin nalor kiwi won ki kaam.
Ha kini ki kajiak sngi em napyrdi ki bru wa da mih ki na Jowai dang step dei thmu u yabeh yei kaam, tangwa neidaw ba joor i sahkhut kari da poi Shillong ki hadooh i janmiet, kamtæ haap noh ki wow liwan khlem yoh pyndep yei kaam, hajrong ini em leh ki bru wa hap u uiñ kylla cha Jowai da ka jooh hi ka kari neibhah wym myntoi de yaki wow lai cha i kaam wada miet i por.
Ini i sahkut kari da jia i haki bynta u sarok nadooh Ummulong hadooh Mawryngkneng, wei i daw hi wa sahkut toh wa sih ki truk, neitæ u sarok leh nadooh Ummulong hadooh Mawryngkneng da man u uwa jæd wa pra, seiwi leh hei bynta u sarok chwa u poi Puriang uwa da oor ha ini wa dep, heini leh ki kari hap ki u lai du chiliang nang, iwa mut hawa lai chilliang hap u sangeh chilliang.
Chooh chooh nalor ini, sa iwi i daw toh wa joor i yaknieh ki kari wow yoh u lai chakhmat dei wym ye u yang ki jar ka pali, heiwa neiliang ki pulit leh chem chitom ki wow pynlai kari.
Heiyatoh wa ini, da yoh leh u sakhi ynne ka sngi wa i sahkut kari da sdang i dang step nadooh Mukhla, Khliehtyrshi, West Jaiñtia Hills hadooh wa poi Mawryngkneng wei ini da neh i waroh chisngi hadooh i janmiet heiwa da lait ini i sahkut kari.
