Ki khynroo khyllood kiwa da chah kem na Rimpu Bagan da phla ki wa chah lehbeiñ ki ha ki pulit ka West Garo Hills nadooh i por wa chah kem ki hadooh wa yoh jamin, wei da pynsñiaw ki yei wym sñiaw chngaaiñ de hawa im ki, khamtam hadien wa da chah pynslem noh ka bichaar kawa da toh u leh ha ka 18 tarik uni u bnai.
Kattu katni ngut na kini kiwa da wan yaklam wa ki laad pathai khubor ha Shillong, da khana ki wa nadooh wa da chah kem ki ha ka 22 tarik u Naiynñiaw ynnin u snem, da chah pyndik ki ha ki pulit deiwa hap yang hadooh 8 kynta ha katai ka miet du wow leh ya ka Medical Checkup. Da khana wa hadien wa da rah ya ki cha thanat leh ym em yoh baam ki najrong wa kem ya ki du deiwa pynbaad neibhah wym em leh ki iyi iyi iwa sih ha katai ka thaw.
Kini ki khynroo khyllood ki wym kwah u pynmih pyrtuid da khana ki wa ha katai ka sngi da lai ki cha Rimpu Bagan ymtoh deiwa thmu wow leh iwon iwon i kaam wa sih tangwa wow lai chongke sñiawbha dei wym tip wa daw em wow jia iyi iyi wei wa chah pynbaad wa kani ka thaw toh kawa man kam ka thaw rieh yow leh ya ki kaam dakait.
Da khana chooh chooh wa hadien wa yoh jamin, ki kattu katni da lai ki wow ujor cha ka National Human Rights Commission wei kamjooh leh da em kiwa lai ujor cha ka Meghalaya Human Rights Commission (MHRC), wei hadien ka ujor waroh da e kti wow bichaar ha ka MHRC, wei da booh tarik wow bichaar ha ka 18 tarik uni u bnai, tangwa ym ye wow chong bichaar wei da kyrriah tarik wow leh noh ha u Wisu (Mar) hadien yong ka Election.
Kini ki khynroo khyllood da pynbaad ki leh wa ki pulit hapoh i yahkhmat u SP ka West Garo Hills, u Vivekanada Rathore wa ka Mamata Hajong kawa man ka Invetigating Officer najrong wa chah lehbeiñ, ha ka 17 tarik uni u bnai ki pulit hapoh i yahkhmat u SP da pyntip ki wa i bichaar da kyrriah chadooh u Wisu.
Kini ki khynroo khyllood da kylli ki leh hajrong i pynslem wow bichaar yow yoh yei hok, wei da ong ki wa lada jia iyi iyi ya ki hapyrdi ini i pynslem, ki yi wow bahkhlieh, lada ki pulit u bahkhlieh ki næ ka MHRC. Kini ki khynroo khyllood kiwa da em katni ha Shillong da khana ki wa daw pyrchang ki wow yachem leh ya u Chairperson yong ka MHRC yow kyrpaad ya oo wow pynsmat yei bichaar.
Kam wow pynkynmmo wa ha ka 22 tarik u Naiynñiaw yong u snem wa dep, da kynreh ya ka Farm House yong u MDC uwa man leh u Vice President ka BJP, u Bernard N Marak kawa tip kam ka Rimpu Bagan kawa em ha Edenbari hajan Tura wei da pynbaad wa ya katai ka thaw kam ka thaw leh ya ki kaam dakait, wei ha katai ka sngi wa ki pulit lai kynreh ki da kem hadooh 73 ngut ki bru deiwa pynbaad wa emkti ki ha ki kaam sih kaam dakait.
