Shillong: Ka seiñ manbei ka chnong Thieddieng ynne ka sngi da pynsñiaw ki yei eh na i thmu ka North Eastern Electric Power Corporation Ltd (NEEPCO) wow chna ya ka Mawphu Hydro Power Project Stage-II.
Hawa yaklam wa kiwa pathai khubor ynne ka sngi ka Simarbon Syierlait da ong ko wa ini i chna ya kani ka project da wanrah ko yei eh neibhah da pam kulmar ya ki dieñ ki siej wa ya i khloo dieñ soh wa kiwi ki mar rep.
Da ong ko wa ka NEEPCO ryngkat wei yasoohbuit wa kiwa kitkaam chnong da tih lehbor ki ya ka tunnel kawa em kamwa 4 phut soodong wow pyllai um khlem tip ki tre thaw iwa da ktah joor ya kiwa imja kpoh neini.
Neiliang ka Westaibon Synjoin da ong ko wa i leh kiwa kitkaam chnong wa ka NEEPCO lakam wa ki toh ki tre thaw wei da dawa wow phah sangeh noh ya ini i leh embor ki, wei lada emkaam wow paan bor chwa na ki tre thaw.
Kini ki manbei da pynsñiaw ki wow pyrchah bait ki hadooh wa kut khlem elaad wow wanrah ya kani ka project.
Ha iwi i liang da khana ki wa da ujor ki ha ka KHADC neibhah wa ktah ko ya i khyndaw i chyiap tangwa neiliang u CEM, u Pynshngain N Syiem uwa man leh u MLA ka thaiñ ym em u leh u iwon iwon hei yatoh wa ini.
Chooh chooh da ong ki wa yoosar u MLA tip u wow tuklar tang cha yung kiwi katwa ya ka yung yong oo da iehbeiñ hi-eh u.
Discussion about this post