U Alan Niangti uwa man leh kam u President ka Synjuk ki Waheh Chnong Jowai, ynne ka sngi heipor wa pynman ya ka yakhih wow pynyoo yei pyrchah wym kit de yei jhep wa da neh da slem ha chnong Jowai khamtam ki thaw wa pynman yaw ha Jowai, da ong u wa ka chnong Jowai toh kawa da pdiang ya ki bru na kylleiñ ka Ri-Loom Jaiñtia.
“Ka chnong Jowai toh kawa da wan ki bru na kylleiñ ka Ri-loom Jaiñtia wei kam ka chnong Jowai kdup ko ya waroh kiwa chong chnong ka Ri-Jaiñtia wei da man ko leh kam ka pliang ja yong uwa boon wa lang, ym em sor ym em nongkyndong, ki thaw yaw da e khlem pait chiliang, ham e wa i jhep u mih i sñiaw liang,”deiwa kyrpaad u ya ki MLA, kiwa mihkhmat wow pait wow yoo ya ini i kaam wei ki kam ka synjuk ym chong sngi thiah sngi ki.
Da ong u leh wa kam ka Synjuk em ko i bahkhlieh wei da jooh chong yalang ko neipor cheipor wei da thoh ko cha ka sorkar, cha u montri ka chnat pynroi sor wa cha u Chief Secretary hajrong ini i kaam.
Heiyatoh won wa i pynkrehkaam ya ka kyndon 144 CrPC ha Mynkjai wei dang em i pteiñ yei pyrchah ya i noh-jhep, u Alan da ong u wa ini man i tlot donhi ka sorkar wow krehkaam.
Da ong u wa ka synjuk da yoo ko ya ka soskular wa soi hapyrdi ka JHADC wa ka Jowai Municipal Board heiyatoh wa i thaw noh jhep ha Mynkjai wei i wymbien ki bor wow pynkrehkaam ya ka soskular tæ poi hadooh uni u pood.
Chooh chooh da ong u wa ka Jowai man ko kam ka District Headquarter kawa kyruiñ ka Ri-loom Jaiñtia tangwa katni da man ko kam ka thaw noh-jhep donhi.
