Jowai: Hadien wa da mih ka hukum ka NGT hei yatoh wa ka wah Myntdu ki bor district ka West Jaiñtia ha kani ka 21 Naitung da pynkrehkaam ko da ka Section 144 CrPC.
Ha kani ka 144 da mana wa ymhoi de u noh jakhlia kam ki jhep, ki khyndaw, u tih moo, u chna yung, u sait kari ha ki thaw sait kari kiwa em hajan ka wah Myntdu, wa kiwi kiwi ki kaam kiwa ye u ktah ya ka.
Ki paidbah da ujor ki deiwa ong wa kani ka Section 144 ym em u krehkaam ko neibhah wa dang pteiñ kini ki kaam khamtam ha ki thaiñ Riatturiem, Riatpamblah, chadooh cha Treiongriang ha kiwa ki thaw sait kari dang krehkaam ki, ki karkhana chna kari dang lai bait ki, i chna yung dang pteiñ i, wat hadooh i noh khyndaw noh jhep harood sarok hajan kani ka wah.
Ynne da yoh u sakhi ya kawi ka thaw sait kari wa em ha Riatpamblah (pyrchah ya ka Stock PHE) wa dang pteiñ ko u sait kari katwa kiwa boon won da man ki kiwa khang katwa kawi ka Karkhana chna kari wa em ha Riatturiem dang wai ko.
Ki yung wa em ha Wah Gate cha liang Chahtngit dang pteiñ i chna ya ki, wa kiwi kiwi ki bynta wa em harood ka wah Myntdu.
Ha Treiongriang hajan kawi ka thaw sait kari da chem ya kawi ka kari Tata Pickup wa em u No. ML 04 C 2989 kawa dang noh khyndaw hajan ka yingkieñ hajrong ka Wah Myntdu wei manda kylli na uwa yah ya ka da ong u wa ymtip u wa ymchah de u noh khyndaw ha ini i bynta.
Hei yatoh wa kini waroh neiliang u DC ka West Jaiñtia Hills u R. Rapthap da ong u wa ya kiwa leh pyrchah daw chim yei pyrtuid yong ki neitæ daw phah cha ka NGT kawow phah hajir won ya ki.
Da pyntip u leh wa man i iwa eh bha ya ki bor District wow krehkaam khlem da yakrehlang ki paidbah waka heiyatoh weini.
Heiyatoh wa kini, neiliang u SP ka West Jaiñtia u R. Muthu da ong u wa ki pulit da sdang ki u lai sylli ya ki sarok yow khang wei wow kem ya kiwa leh pyrchah.
Da kyntu u ya ki paidbah wow pyntip cha ki pulit lada chem ki ya kiwa leh pyrchah deiwa phone namo u message ha u No. u SP 9856040406, u OC ka Jowai Police Station 9856040410, DSP 9856040409, Addl. SP 9856040408.
Wei wa ya i pyrtuid yong kiwa pyntip daw murieh ya ki.
Discussion about this post