Ha kini ki kakjiak sngi, ka KSU da yoh ujor ko na ki phaw ngut ki khynroo kiwa kamai da ki thuk-thuk lyngba ki Apps ki waphær waphær kam ka Rapido hajrong i khang ka chnat Transport ya kini ki App wow krehkaam ki hapoh u pood ka jylla Meghalaya.
Ka KSU da sñiawkhia ko yeini neibhah da ki spah ngut ki khynnah khynroo u dooh kreh ki wei heijooh i por sñiawthooh ko leh wa i khang ka chnat ye i u man katkam ki kyndon aiñ ka jylla.
Hajrong ini ka seiñ da kyntu ko ya ka chnat wow thooh ya ki laad khnang wa ki khynroo u ye biang ki wow kamai da ki thuk-thuk deiwa booh ya ki kyndon aiñ kiwa biang.
Ka seiñ da e nongmuna ko da ka jylla Mizoram heiwa ha u snem 2017 da e Permit ko ya ki thuk-thuk wow kamai kit bru (Passenger) ha kylleiñ ka nongbah Aizawl lyngba ka Two-Wheelers Taxi Service.
Chooh chooh leh hadien won ka chnat Transport ka Mizoram da sdang ko ya ka Online App kawa da tip kam ka Huiva kawa sariem wa ki App kam ka Rapido, Ola, Uber wa kiwi kiwi. Kani ka App da krehkaam ko du ha Mizoram wei da pynlai ya kani ka App da ka sorkar Mizoram neibynta i myntoi kiwa kamai thuk-thuk wa ki paidbah.
Ka seiñ sñiaw ko wa kamwa leh ha Mizoram, ha Meghalaya leh toh u bood ko kam kani ka laad wow yoh kreh ki khynnah ha kiwa boon ki bynta.
