Jowai : Ka KSU Laskeiñ Circle kwah ko u pynkynmoo biang ya ka tnad puræ puthi yong ka sorkar jylla hajrong i dawa yong ka wow booh ka skur SSA ha ka chnong Moolber kawa hap hapoh ka Elaka Raliang kawa man i angnud ki bru wa sah ha kini ki thaiñ.
Hei yatoh wa ini, ka chnong Moolber da man ko kawa smat wow e thaw wow chna ya ka yung skur wei da jooh yachem wow DC warim u PS Dkhar uwa da ekti yeini kaam cha ka Office DMC, Jowai. Tangwa nadooh 2013 hadooh katni ym pu yoo ya ki dak wa chna yei skur.
“Lada ka Assam ye ko u pynyoh skim ha ki chnong weileh won ka sorkar Meghalaya ym ye ko u leh yeini hawa da em ka Status Quo wa da soi waroh ar tylli ki jylla ye ki u e yarap næ leh ya ki kaam pynroi ha kitai ki thaiñ khappood wa Karbi Anglong. Kyntu joor i ya ki bor synchar District West Jaiñtia Hills kamjooh ya ka ophis DMC SSA wow booddien wei wow pynsmat ya kani ka kaam neibynta u myntoi kani ka thaiñ”, da ong u Leaningrad Tariang, General Secretary KSU Laskeiñ Circle.
Ka khubor da kylli ko leh wa lada kiwa synchar ya ka jylla dang kynnoh ki wa pyrchah ka Assam, katni da wai ka laad ya ki kaam pynroi næ pynku ya katai ka thaiñ, weileh wym jooh saam won ya kitæ ki skim (Economic Package) wa jooh kular ya ki pidbah.
Heijooh i por ka KSU Laskeiñ Circle dawa ko na u MLA ka thaiñ u ma Robinus Syngkon (Parliamentary Secretary) wa na u Local MDC u ma Chanky Lyngdoh wow chim ya kani ka kaam khnang wa u man i bha i miat ya kitai ki bru ka thaiñ Block 1.
Discussion about this post