Ha ka sngi lehkmen ya ka 13th National Voter’s Day ynnin ha Shillong wa da pynman da ka yung krehkaam u Chief Electoral Officer, Meghalaya ha pchem ka Meghalaya Legislative Assembly, Khyndailad, da emlang u Chief Secretary ka Meghalaya, u D P Wahlang kam u kongsan.
U Wahlang da ong u wa katkam wa pyntip u CEO ka Meghalaya, da em 21.65 lak ngut kiwa thap Vote heiwa na kini da em 10.68 lak ki chynrang wa 10.92 lak ngut ki kynthai wei ka jylla da man ko kam kawi na ki jylla wa boon da ki kynthai kiwa thap Vote. Na kini da em 290 ngut kam kiwa thap Vote wa da em palat 100 snem i rta wa 22,658 ngut kiwa em 80 snem chaneiñ wei hei sien nyngkong da em 2 Vote kiwa man kam ki Third Gender, 7400 ngut kiwa duna hei doh i pran wa 81,443 ngut kiwa thap Vote hei sien wa nyngkong kiwa man 4% na waroh kiwa thap Vote.
Da ong u leh wa ha ka Election ha u 2018 kiwa thap Vote da wan mih ki 86.65% wei ha kani ka kynti toh u booh thong 95% neibynta ka Election wow wan, kamtæ da kyntu u ya kiwa chong chnong wow mih paidbah ki ha ka 27 tarik u Thohlakhmi yoh chimbynta ha ka tamasa synchaar paidbah wa heh dooh.
Ha kani ka sngi, u kongsan da saam u leh ya ki khusnaam cha kiwa jop ha kiwa boon ki jait yakob.
