Ka FKJGP Jaiñtia Hill Zone ha ka wyrta wa da phah da ong wa ym ye pdiang yei kam yabor u Montri Rangbah yong ka Assam, u Himanta Biswa Sarma wei da pyrchah leh yeini i klam u hapoh ka yung dorbar ka Assam wa ka chnong Mukroh dang haap ko hapoh u pood u ang yong ka Assam.
Ka seiñ da ong ko leh wym ye u pdiang ya ini i kam u Himanta wa ka Mukroh em ko leh hapoh ka West Karbi Anglong District ka Assam.
Chooh chooh ka seiñ da ong ko wa da tip wa nadooh nachwa wow yoh ya ka jylla Meghalaya ha u snem 1972, ka chnong Mukroh toh kawa em hapoh ka Elaka wa kamjooh ka hima ki syiem Jaiñtia. Kamtæ neiliang ka FKJGP Jaiñtia Hill Zone da kyrpaad ko ya ka sokar Meghalaya wow pait wei wow chimkhia ko ya ini i kam embor uni u Montri Rangbah ka Assam.
Da pynkynmmo leh ya ka sorkar wa ki chnong ka thaaiñ Mukroh da maad ki yeiwa boon i eh i khoo hadooh wa da dooh yei mynsien kiwa lui-lui wei da booh leh hei eh ya kiwa kamai ja-kpoh man-ka-sngi.
