U Dr. Randeep Guleria, Director ka All India Institute of Medical Sciences (AIIMS) ynne da pynche u heiyatoh wa i ki kaam wa yatoh wa ka khlam COVID-19.
Hajrong i duna ki dawai wa ka Oxygen, U Dr. Randeep da ong u wa i murieh (Hoarding) ya ki dawai kam i Remdesivir wa ki Oxygen ha ki yung ki sem da wanrah i yei tieñsar yaboi duna kini ki dawai. Da ong u wa kiwa boon wa yoh COVID-19 ymtoh deiwa chitom wa joor wei 85-90% na kiwa yoh toh kiwa iñdoh, ky’oh, i kjut chy’oh wa i kjut doh wei boon toh kiwa ye u sumaar pyn ha yung wei ym emkaam ya ka Oxygen næ i dawai Remdesivir.
Da ong u leh wa kamwa 10-15% na kiwa kjut kiwa joor næ ware wei ye ki wow emkaam Oxygen, Remdesivir næ Plasma wa kiwi kiwi katwa kamwa 5% won ye ki wow emkaam ya ki kor Ventilator kiwa e la-ær wa kiwa emkaam wow booh hapoh ki Intensive Care.
U Dr. Guleria da pynche u leh wa i Remdesivir ym pynduna i yei por wow sah ha ki thaw sumaar tangwa lada joor i chitom næ ware ye i wow pynduna yei por wa thiah ha ki thaw sumaar tangwa lada e ya ini i dawai hawa ym emkaam ye won i wow wanrah da kiwi ki jait chitom. Da ong u leh wa i Remdesivir ye u pynekaam ya ki ha ki thaw sumaar du hawa emkaam donhi (Moderate to severe cases).
Heiyatoh won wa i e Oxygen, da ong u wa kitu kiwa em Oxygen Saturation palat 94, ym emkaam Oxygen ki yow pynboon yei em Oxygen ha i snam heiwa lada e Oxygen ya kini, daw wanrah ko yei duna Oxygen ya kiwa emkaam.
