Ka Madras High Court da kyntu ko ya ka sorkar pyrdi wow chna ya ka aiñ wa sariem wa ka yong ka Australia wow khang ya ki khynnah wa hapoh 16 snem u pynemkaam Social Media ki kam ka Facebook, Instagram, YouTube, TikTok wa kiwi de.
Ini da mih i hawa bichaar ya ka mukotduma S Vijayakumar v. Union of India.
Kani ka aiñ wa da krehkaam ha Australia, da emkaam ya ki Social Media Company wow khang ki ya ki khynnah wa hapoh 16 wow wai Account ki lym kamtæ kini ki Company daw chah daiñ kuna ki. Kani ka aiñ ym em pynchitom ko ya ki khynnah næ ki bei ki pa yong ki.
Ka mukotduma ha ka Madurai Bench ka Madras High Court da kyrpaad ko leh ya ki Internet Service Providers (ISPs) wow pynkrehkaam ya ka Parental Control namo ka “Parental Window Service” ka wow e bor ya ki bei ki pa wow rai iwon næ iyi wa hoi ya ki khon.
Chooh chooh ka yung bichaar da ong ko wa tlot i krehkaam ki Child Rights Commission hapoh ka National Commission for Protection of Child Rights Act, 2005.
“Hanla em i pynche pynsñiawthooh næ ki Awareness Campaign ha ki skur, tangwa ym man ki kiwa biang pura,” da ong ka High Court.
Hanla ka High Court ym em pynmih ko ya kawon kawon ka hukum, da kdaw ko wa ka Supreme Court ha ka mukotduma wa sariem wa ini ha u 2025 da tyrwa ko ya ka sorkar pyrdi wa ki seiñ hajrong i hok wa i bha i miat ki khynnah.
Puræ leh: Sdang krehkaam i khang ka Australia ya kiwa hapoh 16 snem wow pynemkaam Social Media
Discussion about this post