Uwa yahkhmat ka Liang Pyrchah, u Dr. Mukul M Sangma da ong u wa ki pulit ymtoh u man ki i daw wa syier wei tieñ ki paidbah næ wow yaichah ya kiwa em hei bor.
Hawa klam ynnin ka sngi hadien wa wai ka yalang ka State Security Commission (SSC), u Dr. Mukul da ban joor u yei emkaam wow pynkhlan yei rukom krehkaam ki pulit ha ka jylla katkam ki kyndon aiñ.
“Ka chnat pulit ymtoh u chah pynthut næ wow leh chiliang ki ya kiwa em hei bor tangwa toh u lai katkam ka aiñ. Hanla ka thong toh u pynkhan yei rukom krehkaam ki pulit katkam ka aiñ, tangwa em bait ki moochynthut kiwa wan kam i chah yahbakla ha ki bor wa hajrong wa ha ki bru kiwa em ha ka sorkar”, da ong u.
U Dr. Mukul da ong u leh wa ki pulit ymtoh wow chah riam yow leh ya kiwon kiwon ki kaam pyrchah aiñ neibhah daw wanrah yei kaam wa sih iwa daw pynman ya ki paidbah wow artatien yei rukom krehkaam yong ki pulit.
Da khana u leh wa ha ka yalang ka SSC da yaklam sani neibynta wow pynemkaam hok yeiwa em wei i bor yong ki pulit kamwa da booh ha ka Meghalaya State Police Act 2010.
Da yaklam leh yow pyntikna wa i thap kreh pulit ymtoh wow pynslem ki khnang yow pynkhlan ya ki kamwa da pynkup ha ki heiwa u Dr. Mukul da tyrwa u wow pynman yei thung kreh pulit man-u-snem hadien wa em kiwa ku kyrdan wa kiwa chong-ngiah.
Katkam i ong u Dr. Mukul, na ka 100%, boon ki Police Station, ki Police Outpost em bru ki du 50% hadooh 60%, wei i duna bru da pyntlot ko yei rukom krehkaam wei yeini da sakhi lyngba i chah thombor ki kattu katni ki Police Station ha Ri-loom Khasi-Jaiñtia.
Discussion about this post