Jowai: U ma Jopthiaw Lyngdoh Commissioner Secretary District Council Affairs Govt. of Meghalaya da wan jngieh u ia ka Iawmusiang ha kani ka 10 tarik Naikhynde, heiwa neilaing ka JHADC da li synran ia Oo da u Deputy CEM, ma A.A. Shulai, wa u ma Joint Riwell Pyrtuh (EM JHADC), ma Moonlight Pariat MDC wa ki Ophisar na ka JHADC wa na ka PWD. Ini i wan peit u Ma Jop toh yow rah kaiphod u cha ka tnat Planning ka sorkar jylla yow pynsakhiat yei kreh wa dadep ha jrong ka Utilisation Certificate wad a phah ka JHADC cha ka tnat District Council Affair ka sorkar jylla.
U ma Lyngdoh hadien wada yoo u yei dur i dar iong ka yungiaw wa dang chna da ia klam u wa u nongthoh khubor da ong u wa i kreh tæ dalai hi i cha khmat tangwa dang boon bha iwa daw kreh kamtæ dang chimpor bha u dep kani ka iaw. U ma Lyngdoh da ong han lada ka Jaintia Hills District Autonomous District Council ym pu ioh poisa ko leh u phah ia ka second Installment cha ka PWD yow pynkreh, la kattæ leh neiliang iong u kontraktor ym toh u chong ngiah næ u sangeh u yei kreh toh u pyllai beit u yei kaam chaphrang.
Kam pynkynmoo ia u Moo Nongrim wow chna ia ka Iawmusiang Super Market dab ooh haka 10tarik Duiatra 2009, da u Purno Agitok Sangma, Ex. Speaker ka Dorbar chna-ain Lok Sabha. Hadooh uni u snem 2015 kattu da dap 6 snem tam nadooh wa wan booh Moo nongrim wow chna ia ka Iawmusiang Super Market.
Ka Jaintia Hills Autonomous District Council, Jowai, da ioh ko ia ka Poisa ( First instalment) Rs. 6.33 Klur na ka sorkar Pdeiñ (Central Government) kam i jingsdang u pynyieñ u chna noh ia Iawmusiang Super Market. Ia kani ka poisa kawa 6.33 Klur na ka liang ka District Council dadep eti lut ko cha ka PWD neibynta u pynkreh. Heiwa ka PWD da e won ko ha u ma G. Lanong u kontraktor wow kreh.
I lut i sep heiwa u chna ia kani ka Iawmusiang Super Market da mang hadooh 20.9 Klur tyngka.
Discussion about this post