Ka khlam COVID-19 hadooh kini ki sngi dang ktah ko ya ki hajar ngut ki bru hapoh ka jylla heiwa neiliang ki Doctor wa ki bru chemphang na kylleiñ da pynchlur ki wow chim ya i tika yada na kani ka khlam heiwa man ko kawi donhi ki laad wow ye sakhiat wow yada nei chah ktah wa i poor kani ka khlam.
Ha kani ka kynti, u Dr. PM Pyrtuh uwa man kam u ENT Specialist ka Jowai Civil Hospital, Ialong da kyntu u ya ki paidbah wow wan ki chaphrang wow chim ya ini i tika yada na uni u khñiang kjut ym du ya samen tangwa ya ka yung ka sem wa ka chnong ka thaw hi leh waroh kawi.
Da ong u wa sñiawsih wow yoo wa hapoh ka Ri-loom Jaiñtia ki bru dang duna bha kiwa wan chim ya ini i tika neidaw wa artatien ki wei da pynkynmoo u wa ha u snem 2020 da ngoohblai lut ki bru wow chem noh ki stat (Scientist) ya i dawai wow yada na uni u khñiang tangwa manda yoh ya i tika, ki bru won da artatien ki kamtæ da kyntu u ya waroh wow wan chaphrang wow yada na kani ka khlam neibhah wa waroh da ngiah ki wow bood ya ki kyndon wa kdoh wa khoom ya ki bru.
U Dr. Pyrtuh da e yukheiñ u leh wa boon kiwa dooh yei mynsien yong ki na kani ka khlam toh kiwa ympu chim tika wei kiwa da chim tika kiwa da khlaad toh khlaad ki na kiwi ki jait kjut tangwa kiwi won ym em ware u chah ktah ki ha u COVID-19.
Chooh chooh u Dr. Pyrtuh da kyntu u ya ki bru wow em ki i kitkhlieh ya ka yung ka sem ka chnong ka thaw waroh kawi deiwa wan chaphrang wow chim ya i tika,
Da e nongmuna u leh ya ki chnong ha ri sepsngi heiwa da pynman ya ki lympung yalehke Football heiwa ki bru ym em de u daiñ mask ki, wei i daw wa kongsan dooh toh i tika neibhah boon ki bru ha ki ri sepsngi da wan ki chaphrang wow chim ya ini i tika.
