Ka Khasi Author’s Society (KAS) da pynsñiaw ko wa man iwa emkaam wa kiwi ki jaitbru u tip ki ya i ktien Khasi, wei lada waroh kiwa sah ha ri Khasi tip ki wow klam Khasi daw man ko ka kabu wa ka ktien u tipmit noh ya ka ha ka 8th Schedule ka riti synchaar ka ri.
Ka KAS ynne ka sngi da pynman ko ya ka dorbar pyllun, wei da chim leh ya ki rai heiyatoh wow tipmit noh ya kani ka ktien.
U President ka KAS, u Dr. DRL Nonglait da ong u wa ka KAS da rai ko wow leh ya i pynlang yutip namo ka ‘Documentation’ wow rah kam ka sakhi wa im wei khlan i dawa wow tipmit ya ka ktien Khasi heiwa daw pynlang leh ya kiwa em kiwa puræ Khasi ha ki skurbah wa ki skurkhian.
U Dr. DRL Nonglait da ong u wa ka National Education Policy, 2020 da ban joor bha ko wow tip ya ki le tylli ki ktien, ka ktien yong i dæ, ka ktien Hindi, wa ka ktien baar ri namo ka ‘Foreign language’ kawa toh ka ktien phræng.
Da ong u wa emkaam wow tip ya kini ki jait ktien, deiwa pynrap wa ha Meghalaya ka ktien English toh kawa pynekaam paidbah namo ka ‘Official Language’. Da ong chooh chooh u wa neiliang ka KAS kwah ko wow kyntu ya ka ktien Khasi ha waroh ki liang, wei nyngkong toh wa waroh ki paaid toh u tip ki wow klam Khasi.
Chooh chooh da ong u wa ka ktien kawa paaw wei kawa khlan ymdu ya kiwa mantre ya ka jaitbru, tangwa kiwi ki jaitbru kiwa sah ha kitu ki thaw toh u tip ki ya i ktien, deiwa e nongmuna u wa ha Shillong em ki jaitbru wa boonjait, wei kiwa chong ha Shillong toh u tip ki ya ka ktien Khasi, wei toh u pynbor ya ki wym toh na ka jaitbru wow klam dei Khasi.
