U Montri ka chnat Social Welfare uwa man leh u MLA ka UDP na Khliehriat, u Kyrmen Shylla da ong u wa lada chem wa u payu u emkti u ha i tih mooyong pyrchah yaka aiñ kamwa da pynbaad, toh u pynchitom katkam ka aiñ, wei u pdiang sñiawbha ya kawon kawon ka takit hajrong i pynbaad.
Hadien wa yap ki 6 ngut kiwa tih mooyong ha kawi ka paar mooyong kawa em ha Deiñshalalu, Elaka Rymbai ha East Jaiñtia Hills, da pynbaad wa katai ka paar tih pyrchah yaka aiñ ya u mooyong toh kawa da pynkreh da u payu u Kyrmen u Bishon Shylla.
U Kyrmen da ong u wa kiwa ha yung toh u chah kem ki lada em sakhiat ka sabut wa ki emkti ki ha ka kaam tih mooyong pyrchah yaka aiñ. Wei toh u pynman yaka takit kawa bniah pyrchah ya ki neibhah ka aiñ man ko i jooh ya waroh lada man u Montri sorkar, uwa kreh mylla lane ki bru paidbah.
Hawa kylli lada em iwon iwon i thmu kawa cha kylla wa em kiwa pyrchang wow pynboodnaam ya u payu yong oo, da pynsñiaw u wa ym ye wow ong iyi iyi, tangwa da ong u wa daw yang yaka Report ka takit kawa da thung da ka sorkar hajrong i yap yong ki 6 ngut kiwa mylla.
Da kyntu u leh yaki sahep sorkar wa ki chnat kiwa pynman yaka takit wow pynman da kawa bniah khnang wa ki bru kiwa lui lui ym ngat ki hei chah pynchitom.
