Hajrong ka yalang wa da khut pynman da ka sorkar MDA-II wow pynman mynstep ka sngi deiwa ya emlang waroh ki seiñ saiñ pyrthai yow pynche hajrong ka Roster System, ka KSU da ong ko wa lada pynkrehkaam deiwa kheiñ nadooh wa sdang ka Reservation Policy, ki MLA yong i toh u pyrchah ki.
Ka seiñ da ong ko wa hadien wa phah pynkrehkaam ya ka Roster System da ka High Court ka Meghalaya ya ka sorkar jylla, iwa sñiawsih won wa ka sorkar hawa pynkrehkaam ya kani ka Roster System da kyruiñ pathan ko chadien neidaw wym em biang i yoh kaam ki Garo katkam ka bhah 40:40 wei katkam ka ujor ki kattu katni ki seiñbhalang na Ri-loom Garo kiwa da ong wa waroh chi kattu ym em yoh hok yei bhah kreh katkam ka Reservation Policy wei ini daw ktah ko chiboon ya ki Khasi neibhah kattu ym man de ko 40 la 40 i bhah kreh tangwa da hiar chooh chooh ko.
Ka seiñ da kdaw ko leh wa hawa pait yei boon bru leh ym yahaap de wow bhah 40:40 iwa da pyndooh nong bha ya ki Khasi neibhah wa rap heh paaid ki ya ki Garo wei lada kheiñ chadien i pynkrehkaam ya ka Roster System daw booh ko yei eh wa ar chah ya ki khynroo khyllood Khasi wa kattu ym yoh de ki tang ya ka bhah wa 40%.
Kamtæ ka KSU da kyntu ya waroh ki MLA ka jaitbru yong i wow pyrchah bait yei pynkrehkaam deiwa kheiñ nadooh warim ya ka Roster System wei wow dawa bait u pynkrehkaam neini chakhmat.
Chooh chooh da ong wa lada ka sorkar ka sñiaw ko wa i pynkrehkaam deiwa kheiñ nadooh warim ya ka Roster System toh yow pyndap yei dooh nong ki Garo nadooh u snem 1972, da man ko kamwa chah pynchitom, chah pynsaja wei pynkit pap ya ki khynroo khyllood Khasi kiwa thooh kreh katni du neidaw wa kiwa nachwa bakla ki ym mut wow pynchitom ya kiwa katni kiwa lui-lui ki wym embynta iyi iyi ha iwa jia nachwa kiwa kwah donhi wow yoh yei hok yong ki katni ha ki kaam sorkar.
Kamtæ da dawa na ka sorkar MDA wa ya ka Roster System toh u pynkrehkaam deiwa kheiñ neini chakhmat nadooh wa pynmih hukum khnang wa i yoh nong u man ko salonsar yow lait nei dooh nong yong kawi ka jaitbru.
