Ka East Jaintia National Council (EJNC) Khliehriat Circle da phah chithi ko cha u Montri Rangbah ka jylla, u Conrad Sangma lyngba u Deputy Commissioner ka East Jaiñtia Hills District u E. Kharmalki yow pyrkhat bha yei rep dieñ Satlai namo ka Palm Oil Cultivation ha Meghalaya.
Ka seiñ da ong ko wa ini i thmu ka sorkar pyrdi wow wanrah ya ka National Mission on Edible Oils yow ye ka ri wow pyndap yei emkaam i phniang baam, daw ktah ko ya ka rymaw deiwa pynbor wow rep ya uni u dieñ ha ki jylla ka thaaiñ mihsngi.
Ka seiñ da kdaw ko leh hadooh katwon wa da chah ktah ki ri kam ka Indonesia wa ka Malaysia nei rep ya uni u dieñ heiwa da lut ki khloo wa da chah pam neibynta uni u dieñ yow pyndap yeiwa emkaam yong kiwi ki ri.
Kamtæ da ong wa ka Meghalaya kawa man kawa mahajon ha ki spah rymaw nadooh ki mrad ki khloo, daw chah ktah bha ko lada thung ya u dieñ Satlai uwa da jooh thung leh du cha ki thaw wa chit ka pyrthai uwa emkaam wow thwat wow pynkhooid ya chiboon i khloo yow mih u du oo samen wei ini daw ktah kylla ko yei man nadooh i suiñ i thaw wa thung ya uni u dieñ.
Da seiñ da sñiaw ko leh wa hanla i rep ya uni u dieñ ye i wow wanrah yei yoh kreh tangwa lada kheiñ won yei dooh nong ym sñiaw yahap de neibhah ki myntoi toh du iwa chibet chipor donhi.
Hajrong ini waroh, ka EJNC-Khliehriat Circle da ong ko wa ini daw ktah i yei rukom im ki jaitbru ri-loom, wei yei hok wow jied wow leh heini toh ha ki paidbah ym toh deiwa pynbor.
Kamtæ da e buit wa chwa wow sdang yei rep ya uni u dieñ Satlai toh u puræ bniah yei ktah u ya ka rymaw wa ka imlang sahlang deiwa yaklam leh wa ki seiñ wa em hapoh ka jylla chwa wow lai chakhmat.
